काठमाडौं । नेकपा (एमाले) का अध्यक्ष केपी शर्मा ओलीले नेपाललाई समृद्ध बनाएपछि मात्रै नेपालीले सुख प्राप्त गर्ने बाटो खुल्ने बताएका छन् । विश्व आदिवासी दिवसका अवसरमा शुभकामना सन्देश जारी गर्दै अध्यक्ष ओलीले राष्ट्रलाई समृद्धिको गन्तव्यमा अघि बढाउन सबैको सहभागिता आवश्यक रहेको बताएका हुन् ।
उनले राष्ट्रको समृद्धिको यात्रामा केही समय अवरोध आए पनि लामो समयसम्म यस्तो अवस्था कायम रहन नसक्ने उल्लेख गरेका छन् । ओलीले दशकौँ लामो संघर्ष र बलिदानबाट स्थापित समावेशी प्रतिनिधित्व, न्याय र समानतामा आधारित संविधानको रक्षा र सुदृढीकरण गर्ने दायित्व सबैको भएको बताएका छन् ।
उनले नेपालका सबै समुदायको सहभागितामा देशलाई समृद्ध बनाउने दिशामा विगतमा सफलता हासिल हुँदै आएको उल्लेख गर्दै आगामी दिनमा पनि त्यसलाई निरन्तरता दिनुपर्ने बताएका छन् ।
३२ औँ विश्व आदिवासी दिवसका अवसरमा ओलीले स्वदेश तथा विदेशमा रहेका सम्पूर्ण आदिवासी समुदायका दिदीबहिनी तथा दाजुभाइलाई शुभकामना व्यक्त गरेका छन् ।
उनले विश्व आदिवासी दिवस आदिवासी समुदायको हक, अधिकार, संस्कृति र विशिष्ट पहिचानलाई संयुक्त राष्ट्रसङ्घले लिपिबद्ध गरेको ऐतिहासिक दिन भएको बताएका छन् ।
नेपाल जातीय, भाषिक, धार्मिक, सांस्कृतिक तथा भौगोलिक विविधताले सम्पन्न मुलुक भएको उल्लेख गर्दै ओलीले यस बहुसांस्कृतिक विशेषतालाई विभाजनको आधार नभई राष्ट्रिय एकता र शक्तिका रूपमा विकास गर्नुपर्नेमा जोड दिएका छन् ।
सदियौँदेखि कायम रहेको आपसी मेलमिलाप, भाइचारा र सहअस्तित्वको परम्परालाई थप प्रगाढ बनाउँदै विविधताबीच राष्ट्रिय एकता कायम गर्नुपर्ने उनको भनाइ छ ।
प्रतिक्रिया