धनगढी। सुदूरपश्चिम प्रदेशको मुख्यमन्त्रीमा नेपाली कम्युनिस्ट पार्टी (नेकपा) संसदीय दलका नेता खगराज भट्ट नियुक्त भएका छन्।
प्रदेश प्रमुख नजिर मियाँले संविधानको धारा १६८ को उपधारा (२) बमोजिम भट्टलाई मुख्यमन्त्रीमा नियुक्त गरेका हुन्। नेकपा एमालेको समर्थनमा बहुमत जुटाउँदै भट्टले बिहीबार मुख्यमन्त्री पदका लागि दाबी पेस गरेका थिए।
यसअघि ३१ असारमा नेकपा एमालेले समर्थन फिर्ता लिएपछि कमलबहादुर शाह नेतृत्वको प्रदेश सरकार अल्पमतमा परेको थियो। त्यसपछि शाहले बिहीबार मुख्यमन्त्री पदबाट राजीनामा दिएका थिए।
शाहको राजीनामापछि प्रदेश प्रमुख मियाँले संविधानको धारा १६८ को उपधारा (२) अनुसार दुई वा दुईभन्दा बढी दलको समर्थनमा बहुमत जुटाउन सक्ने प्रदेशसभा सदस्यलाई मुख्यमन्त्रीमा दाबी पेस गर्न आह्वान गरेका थिए।
सोहीअनुसार एमालेको समर्थनमा भट्टले दाबी पेस गरेपछि प्रदेश प्रमुख मियाँले उनलाई मुख्यमन्त्री नियुक्त गरेका हुन्।
नवनियुक्त मुख्यमन्त्री भट्टले आजै दिउँसो पद तथा गोपनीयताको शपथ लिने कार्यक्रम रहेको छ।
प्रतिक्रिया