काठमाडौं । काठमाडौंको त्रिपुरेश्वरमा यात्रुवाहक बसमा भएको आगलागीमा घाइते भएका चालकको अवस्था गम्भीर रहेको चिकित्सकहरूले बताएका छन्।
सोमबार मध्याह्न त्रिपुरेश्वरचोकस्थित बस स्टपमा रिद्धिसिद्धि यातायातको बा ५ ख ४२७४ नम्बरको बसमा भीषण आगलागी भएको थियो। आगलागीमा बसका चालक काभ्रे घर भएका २५ वर्षीय दावा लामा घाइते भएका हुन्।
आगलागीपछि लामालाई तत्काल उपचारका लागि कीर्तिपुरस्थित बर्न अस्पताल पुर्याइएको थियो। उनलाई दिउँसो करिब १ बजे अस्पताल ल्याइएको उपचारमा संलग्न चिकित्सकले बताएका छन्।
कीर्तिपुर अस्पताल (बर्न अस्पताल)का वरिष्ठ प्लास्टिक सर्जन डा. शंकरमान राईका अनुसार शरीरको करिब ९० प्रतिशत भाग जलेको चालक लामाको अवस्था गम्भीर छ ।
अचानक बसमा आगलागी भएपछि बस पूर्ण रूपमा जलेर क्षतिग्रस्त भएको छ। आगलागीको कारणबारे प्रहरीले अनुसन्धान गरिरहेको जनाएको छ।
प्रहरीको प्रारम्भिक अनुसन्धानअनुसार चालक लामाले आफैँ बसमा आगो लगाएको हुन सक्ने देखिएको छ। घटनाबारे थप अनुसन्धान भइरहेको प्रहरीले जनाएको छ।
प्रतिक्रिया