काठमाडौं । प्रधानमन्त्री बालेन्द्र शाहले आगामी नोभेम्बरको तेस्रो साता अर्थात् मंसिरको पहिलो साता भारतको औपचारिक भ्रमण गर्ने तयारी भएको छ ।
परराष्ट्र मन्त्रालय स्रोतका अनुसार प्रधानमन्त्री शाहको भारत भ्रमणका लागि नोभेम्बरको तेस्रो साता समय तय गर्ने गरी कूटनीतिक तहमा छलफल भइरहेको छ । यद्यपि भ्रमणको ठ्याक्कै मिति भने औपचारिक रूपमा टुंगो लागिसकेको छैन ।
प्रधानमन्त्री नियुक्त भएलगत्तै भारतीय प्रधानमन्त्री नरेन्द्र मोदीले शाहलाई भारत भ्रमणको निमन्त्रणा दिएका थिए । भारतको विदेश मन्त्रालयले समेत गत जुलाईमा प्रधानमन्त्री शाहलाई भारत भ्रमणको निमन्त्रणा दिइएको औपचारिक रूपमा पुष्टि गरेको थियो ।
प्रधानमन्त्री शाहले त्यतिबेला उपयुक्त समयमा भारत भ्रमण गर्ने बताएका थिए । हाल संयुक्त राष्ट्रसङ्घको महासभामा सहभागी हुन न्यूयोर्क पुगेका प्रधानमन्त्री शाह र परराष्ट्रमन्त्री शिशिर खनाल स्वदेश फर्किएपछि भ्रमणको तयारीलाई तीव्रता दिने परराष्ट्र मन्त्रालय स्रोतले जनाएको छ ।
यसअघि न्यूयोर्कमा परराष्ट्रमन्त्री खनाल र भारतीय विदेशमन्त्री डा. एस. जयशंकरबीच भएको भेटवार्तामा पनि प्रधानमन्त्री शाहको भारत भ्रमणका विषयमा छलफल भएको जनाइएको छ । दुई देशबीच रहेका विभिन्न द्विपक्षीय संयन्त्रलाई सक्रिय बनाउँदै सहकार्यलाई थप सघन बनाउने विषयमा समेत छलफल भएको स्रोतको भनाइ छ ।
प्रधानमन्त्री शाहको भारत भ्रमणलाई नेपाल-भारत सम्बन्धका विविध पक्षमा छलफल तथा द्विपक्षीय सहकार्य अघि बढाउने अवसरका रूपमा हेरिएको छ । भ्रमणका क्रममा कनेक्टिभिटी, ऊर्जा, पूर्वाधार, व्यापारलगायत विषयमा छलफल हुने सम्भावना रहेको भारतीय सञ्चारमाध्यमले जनाएका छन् ।
प्रतिक्रिया