काठमाडौं । एसियाली खेलकुदअन्तर्गत पुरुष क्रिकेटमा नेपालले आयोजक जापानलाई १५० रनको चुनौतीपूर्ण लक्ष्य दिएको छ ।
वर्षाका कारण १५ ओभरमा छोट्याइएको खेलमा नेपालले निर्धारित १५ ओभरमा चार विकेट गुमाएर १४९ रन बनाएको हो ।
नेपालका लागि सन्दीप जोराले उत्कृष्ट ब्याटिङ गर्दै ३२ बलमा पाँच चौका र तीन छक्कासहित नटआउट ५७ रन बनाए । त्यस्तै, लोकेश बमले आक्रामक ब्याटिङ गर्दै २२ बलमा एक चौका र छ छक्काको मद्दतमा नटआउट ५२ रन जोडे । उनले खेलको अन्तिम बलमा छक्का प्रहार गर्दै अर्धशतक पूरा गरेका हुन् ।
ओपनर आसिफ शेखले १५ बलमा २१ रन बनाए । कुशल भुर्तेल १२ बलमा चार रन बनाएर आउट भए । त्यस्तै, कुशल मल्ल र गुलशन झा समान दुई रनमा आउट भए ।
अब जापानले १५ ओभरमा १५० रनको लक्ष्य पछ्याउनेछ ।
प्रतिक्रिया