काठमाडौं । २० औँ एसियाली खेलकुदअन्तर्गत पुरुष क्रिकेटमा नेपाल र आयोजक जापानबीचको खेल वर्षाका कारण नतिजाविहीन भएको छ ।
वर्षाका कारण निर्धारित समयभन्दा करिब एक घण्टा ढिलो सुरु भएको खेल १५ ओभरमा छोट्याइएको थियो । टस हारेर पहिले ब्याटिङ गरेको नेपालले निर्धारित १५ ओभरमा चार विकेट गुमाएर १४९ रन बनाएको थियो ।
नेपालका लागि सन्दीप जोराले ३२ बलमा पाँच चौका र तीन छक्कासहित नटआउट ५७ रन बनाए । लोकेश बमले २२ बलमा एक चौका र छ छक्काको मद्दतमा नटआउट ५२ रन जोडे । त्यस्तै, आसिफ शेखले २१ रन बनाए ।
जापानका रियो साकुरानो थोमस, इब्राहिम ताकाहाशी, कुसुदा नारानी र डेक्लान सुजुकीले समान एक–एक विकेट लिए ।
नेपालको इनिङ सकिएलगत्तै पुनः वर्षा भएपछि मैदानको पिचलाई कभरले ढाकिएको थियो । लगातार वर्षा भएका कारण जापानको इनिङ सुरु हुन सकेन र खेल नतिजाविहीन भएको हो ।
नतिजाविहीन भएपछि नेपालले एक अंक पाएको छ । नेपालले समूह ‘ए’ मा दुई खेलबाट तीन अंक जोड्दै समूह विजेताका रूपमा क्वाटरफाइनलमा स्थान बनाएको छ । अफगानिस्तान दुई खेलबाट दुई अंकसहित समूह उपविजेता बनेको छ ।
क्वाटरफाइनलमा नेपालले श्रीलंकासँग तथा अफगानिस्तानले भारतसँग प्रतिस्पर्धा गर्नेछ ।
प्रतिक्रिया