काठमाडौं । यस वर्षको मनसुन नेपालबाट क्रमशः बाहिरिन थालेको छ। नेपाल मौसम विज्ञान विभागअन्तर्गतको मौसम पूर्वानुमान महाशाखाका अनुसार सुदूरपश्चिम, कर्णाली र लुम्बिनी प्रदेशका पश्चिमी भूभागका अधिकांश स्थानबाट मनसुन बाहिरिएको छ।
महाशाखाले शनिबार असोज १७ गते जारी गरेको मनसुन बहिर्गमन विशेष बुलेटिनअनुसार गण्डकी प्रदेशको पश्चिमी भूभागका केही स्थानबाट समेत मनसुन बाहिरिएको छ। यद्यपि मध्य तथा पूर्वी नेपालमा भने मनसुनी वायुको प्रभाव अझै कायमै रहेको छ।
महाशाखाका अनुसार मनसुन सुदूरपश्चिम प्रदेश, कर्णाली प्रदेश, लुम्बिनी प्रदेशको पश्चिमी भूभागका धेरै स्थान र गण्डकी प्रदेशको पश्चिमी भूभागका थोरै स्थानबाट बाहिरिएको हो।
मनसुनी वायु क्रमशः कमजोर हुँदै गइरहेकाले बाँकी भूभागबाट पनि केही दिनभित्र मनसुन बाहिरिने सम्भावना रहेको महाशाखाले जनाएको छ।
मौसमविद्का अनुसार मनसुन एकैपटक देशभरबाट बाहिरिने प्रणाली होइन। यो पश्चिमी क्षेत्रबाट क्रमशः पूर्वतर्फ सर्दै जाने र अन्तिममा कोसी प्रदेशबाट बाहिरिने गर्छ।
त्यसैले देशका पश्चिमी तथा उत्तरी भूभागबाट मनसुन बाहिरिए पनि मध्य र पूर्वी नेपालमा यसको प्रभाव केही दिनसम्म रहन सक्ने मौसमविद्हरूले बताएका छन्।
प्रतिक्रिया