काठमाडौं । नेपाली कांग्रेसको १५औं महाधिवेशन आइतबारदेखि काठमाडौंमा सुरु हुँदैछ । ‘परम्पराको सम्मान र परिवर्तनको संकल्प : समुन्नत नेपालका लागि सबल कांग्रेसको विकल्प’ भन्ने नारासहित महाधिवेशन सुरु हुन लागेको हो ।
महाधिवेशनको उद्घाटन समारोह आइतबार दिउँसो २ बजे काठमाडौंको खुलामञ्चमा हुने कांग्रेसले जनाएको छ । महाधिवेशनको बन्दसत्र तथा अन्य कार्यक्रम सोमबार र मंगलबार अर्थात् १९ र २० असोजमा हुनेछन् ।
केन्द्रीय निर्वाचन समितिका अनुसार महाधिवेशनअन्तर्गत निर्वाचन कार्यक्रम २१ र २२ असोजका लागि तय गरिएको छ । महाधिवेशन प्रतिनिधिहरूको नाम दर्ता भने शुक्रबार र शनिबार गरिएको थियो ।
कांग्रेस प्रवक्ता देवराज चालिसेका अनुसार महाधिवेशन प्रतिनिधिको नाम दर्ताका लागि ३ हजार ५ सय रुपैयाँ शुल्क तोकिएको छ ।
नाम दर्ता गरेका प्रतिनिधिलाई कांग्रेसले झोला उपलब्ध गराएको छ । झोलामा पार्टीको विधान, डायरी, डटपेन, खाना, खाजा तथा नास्ताका लागि कुपन र प्रतिनिधि कार्ड राखिएको छ ।
प्रतिक्रिया