बुटवल । वातावरण संरक्षण तथा जनचेतना अभिवृद्धि गर्ने उद्देश्यले बुटवलमा कलेजका विद्यार्थीहरूले वातावरणीय जनचेतनामूलक ‘मास मार्च’ गरेका छन् ।
रोट्रयाक्ट क्लब अफ क्षितिज इन्टरनेसनल कलेजको आयोजनामा बिहीबार भएको मार्चमा विभिन्न कलेजका विद्यार्थीहरूको उल्लेख्य सहभागिता रहेको थियो । विद्यार्थीहरूले वातावरण संरक्षण, सरसफाइ तथा हरियाली प्रवर्द्धनसम्बन्धी सन्देश लेखिएका प्लेकार्ड तथा ब्यानर बोकेर जनचेतनामूलक मार्च गरेका थिए ।
बुटवल राजमार्ग चौराहाबाट सुरु भएको मार्च बुटवल अस्पताल लाइन हुँदै पुनः चौराहामा पुगेर समापन गरिएको थियो । मार्चमा सहभागी विद्यार्थीहरूले वातावरण जोगाउनुपर्ने, सार्वजनिक स्थानमा फोहोर नगर्नुपर्ने तथा स्वच्छ र हराभरा वातावरण निर्माणमा सबैको भूमिका हुनुपर्ने सन्देश दिएका थिए ।
कार्यक्रमको अध्यक्षमा रोट्रयाक्टर निरुता खनाल र सचिवमा रोट्रयाक्टर सुदीप मरासिनी रहेका थिए । कार्यक्रमको होस्ट क्लब रोट्रयाक्ट क्लब अफ क्षितिज इन्टरनेसनल कलेज रहेको थियो ।
त्यस्तै, रोट्रयाक्ट क्लब अफ मणिग्राम, रोट्रयाक्ट क्लब अफ देवदह मेडिकल कलेज, रोट्रयाक्ट क्लब अफ तिनाउ बुटवल, रोट्रयाक्ट क्लब अफ तिनाउ सिटी र रोट्रयाक्ट क्लब अफ राममरी मल्टिपल क्याम्पस को–होस्ट क्लबका रूपमा सहभागी थिए ।
विद्यार्थीको सहभागितामा गरिएको मार्चले वातावरण संरक्षणलाई व्यवहारमा उतार्नुपर्ने र वातावरणीय विषयमा युवापुस्ताको सक्रिय सहभागिता आवश्यक रहेको सन्देश दिएको आयोजकले जनाएको छ।
प्रतिक्रिया