काठमाडौं । विजया दशमीको टीकाको तेस्रो दिन आज पनि मान्यजनबाट टीका र जमरा ग्रहण गरी बडादसैँ मनाइँदैछ । दसैँको मुख्य दिन टीका थाप्न नभ्याएका आफन्त तथा मान्यजनकहाँ पुगेर टीका लगाउने क्रम जारी छ ।
नवदुर्गाको प्रसादका रूपमा मान्यजनका हातबाट शुभ साइतको प्रतीक रातो टीका र समृद्धिको प्रतीक जमरा लगाएर आशीर्वाद लिने परम्परा छ । सोही परम्पराअनुसार आज पनि आफन्त तथा परिवारजनबीच भेटघाट गरी दसैँ मनाउने क्रम जारी रहेको छ ।
यस वर्ष बुधबार विजया दशमीको मुख्य दिन थियो। मुख्य दिन टीका लगाउन नभ्याएकाहरूले त्यसपछि पनि आफन्त तथा मान्यजनकहाँ पुगेर टीका थाप्ने गरेका छन् ।
बडादसैँको मुख्य दिन विजया दशमी भए पनि कोजाग्रत पूर्णिमासम्म मान्यजनबाट दुर्गाको प्रसादका रूपमा टीका र जमरा ग्रहण गर्ने चलन छ । यही परम्पराका कारण आज पनि काठमाडौंमा टीका लगाउने, लगाइदिने तथा आशीर्वाद लिने-दिने क्रम जारी छ ।
प्रतिक्रिया