काठमाडौं । भारतका विदेश सचिव विक्रम मिश्री दुईदिने औपचारिक भ्रमणका लागि आज काठमाडौं आउने भएका छन् । प्रधानमन्त्री वालेन्द्र शाह (बालेन)को भारत भ्रमणका एजेन्डा तय गर्न उनी नेपाल आउन लागेको जनाइएको छ ।
परराष्ट्र सचिव अमृतबहादुर राईको निमन्त्रणामा मिश्रीले आज र भोलि नेपालको औपचारिक भ्रमण गर्न लागेका हुन् ।
परराष्ट्र मन्त्रालयका अनुसार भ्रमणका क्रममा नेपालका परराष्ट्र सचिव र भारतीय विदेश सचिवबीच द्विपक्षीय वार्ता हुनेछ । वार्तामा नेपाल–भारतबीचको घनिष्ठ तथा मैत्रीपूर्ण सम्बन्धलाई थप सुदृढ बनाउने उद्देश्यसहित द्विपक्षीय सम्बन्धका विविध आयाम र आपसी हितका विषयमा छलफल हुनेछ ।
“दुवै पक्षले नेपाल-भारत सम्बन्धका विविध आयामहरूको समीक्षा गर्नुका साथै आपसी हितका विषयहरूमा विचार आदान–प्रदान गर्नेछन्,” परराष्ट्र मन्त्रालयले जारी गरेको विज्ञप्तिमा उल्लेख छ ।
भ्रमणका क्रममा भारतीय विदेश सचिव मिश्रीले नेपालका उच्चपदस्थ विशिष्ट व्यक्तिहरूसँग शिष्टाचार भेटवार्ता गर्ने कार्यक्रम पनि रहेको छ ।
मिश्री कात्तिक १९ गते स्वदेश फर्किने कार्यक्रम रहेको छ ।
प्रतिक्रिया