काठमाडौं । दुई दिने नेपाल भ्रमणमा आएका भारतीय विदेश सचिव विक्रम मिश्रीले प्रधानमन्त्री केपी शर्मा ओलीसँगको भेटपछि शीतल निवास पुगेर राष्ट्रपति रामचन्द्र पौडेलसँग शिष्टाचार भेट गरेका छन्।
आइतबार बिहान काठमाडौं आएका सचिव मिश्रीले प्रधानमन्त्री केपी शर्मा ओलीसँग भेट गरेपछि शितलनिवास पुगेर राष्ट्रपति पौडेललाई भेटेका हुन्।
भेटमा राष्ट्रपति पौडेलले भारतलाई उदाउँदो अन्तर्राष्ट्रिय शक्ति बताउँदै त्यसको सामाजिक–आर्थिक र प्राविधिक प्रगतिबाट नेपाल लाभान्वित हुँदै आएको र अझै बढी लाभ लिन चाहेको सन्देश दिएका छन्।
भारतीय पक्षले पनि प्रधानमन्त्री नरेन्द्र मोदीको “छिमेक पहिलो” नीतिअनुसार नेपाल उच्च प्राथमिकतामा रहेको दोहोर्याएको छ । उसले समसामयिक कनेक्टिभिटी तथा विकास एजेन्डामा सहकार्य बढाउने संकेत गरेको छ ।
परराष्ट्र सचिव अमृतबहादुर राईको निमन्त्रणामा दुई दिने नेपाल यात्रा अन्तर्गत आज काठमाडौं आएका सचिव मिश्रीले कांग्रेस सभापति शेरबहादु देउवा, माओवादी केन्द्रका अध्यक्ष प्रचण्ड र परराष्ट्रमन्त्री आरजु राणालाई पनि भेट गर्ने कार्यक्रम छ । मिश्री भोलि पशुपतिनाथको दर्शन गरेर स्वदेश फर्किनेछन् ।
प्रतिक्रिया