काठमाडौं । नेकपा एमालेका सचिव महेश बस्नेतले वर्तमान सरकारको आयु लामो नरहने दाबी गर्दै सरकारविरुद्ध राजनीतिक आन्दोलनलाई व्यवस्थित रूपमा अघि बढाउनुपर्ने बताएका छन् ।
नेकपा एमाले बागमती प्रदेश कमिटीको बैठकलाई सम्बोधन गर्दै बस्नेतले वर्तमान सरकारलाई आगामी नयाँ वर्षसम्म पनि टिक्न दिन नहुने बताएका हुन् । उनले सरकारविरुद्धको आन्दोलनलाई प्रभावकारी बनाउन पार्टीको संगठनात्मक संरचना थप सुदृढ गर्नुपर्नेमा जोड दिए ।
सरकारविरुद्धको आन्दोलनमा आवश्यकता अनुसार अन्य राजनीतिक दलहरूसँग समेत सहकार्य गरेर अघि बढ्ने एमालेको रणनीति रहेको उनले बताए ।
‘भ्रममा बाँचेको, देशलाई जलाएर आएको, खरानी ग्याङ भनेर युवाहरूले उपमा दिएको, सहकारी ठगीलगायतका आपराधिक कर्ममा संलग्न रहेको पार्टी र त्यसका नेताहरू संलग्न रहेको वर्तमान सरकारको आयु धेरै लामो रहने छैन । यो सरकारलाई आउँदो नयाँ वर्ष देखाउन दिनु हुँदैन,’ बस्नेतले भने ।
उनले सरकारका कथित अलोकतान्त्रिक गतिविधिलाई प्रविधिको माध्यमबाट आम नागरिकमाझ पुर्याउन पार्टीका नेता तथा कार्यकर्तालाई निर्देशनसमेत दिए । सरकार र सत्तारुढ दलको नेतृत्व सहकारी ठगीलगायत आपराधिक गतिविधिमा संलग्न रहेको आरोप पनि उनले लगाए ।
बस्नेतले एमालेले अन्य राजनीतिक दलहरूसँग आवश्यकताअनुसार सहकार्य गर्दै आन्दोलनलाई व्यवस्थित बनाउने बताए । त्यसका लागि पार्टीको संगठनात्मक संरचना र स्थानीय कमिटीहरूलाई थप मजबुत बनाउनुपर्ने उनको भनाइ छ ।
उनले आगामी स्थानीय तह र प्रदेश तहका निर्वाचनलाई लक्षित गरी अहिलेदेखि नै संगठन निर्माण र चुनावी तयारीमा जुट्न कार्यकर्तालाई आग्रह गरे ।
आगामी निर्वाचनमा एमाले पहिलो राजनीतिक शक्तिका रूपमा स्थापित हुने लक्ष्यसहित पार्टी अघि बढ्नुपर्ने उनले बताए ।
प्रतिक्रिया