काठमाडौं । नेकपा माओवादी केन्द्रले केन्द्रीय सदस्य कल्पना शर्मालाई काठमाडौं क्षेत्र नं. ५बाट प्रतिनिधिसभामा प्रत्यक्षतर्फको उम्मेदवारमा सिफारिस गरेको छ ।
माओवादीको काठमाडौं जिल्ला समितिको हिजो सम्पन्न बैठकले शर्माको एकल उम्मेदवारी सिफारिस गरेको हो ।
क्षेत्र नं. ५ का लागि पार्टी इन्चार्ज समेत रहेकी केन्द्रीय सदस्य शर्मा यसअघि २०७४ को स्थानीय तह निर्वाचनमा टोखा नगरपालिकाको मेयरका प्रत्यासी थिइन । टोखा बुढानिलकण्ठ क्षेत्रमा निकै सक्रिय शर्मा बागमती प्रदेशको योजना आयोग सदस्यको रुपमा समेत काम गरिसकेकी छिन् ।
पार्टीप्रति समर्पित शर्मा स्थानीय जनताको दुःख सुखमा सहभागी हुँदै आएकी छिन् । माओवादीका नेता कार्यकर्ता समर्थकका लागि मात्र नभएर अन्य पार्टीसहित सबै जनताको काम गर्न अघि सर्ने शर्मा कानून व्यवसायी समेत हुन् ।
आफुलाई सिफारिस गर्ने पार्टीप्रति आभार व्यक्त गर्दै शर्माले प्रतिनिधिसभा निर्वाचनमा सहज प्रतिस्पर्धा गर्ने बताइन ।
यस क्षेत्रमा नेकपा एमालेबाट वरिष्ठ उपाध्यक्ष ईश्वर पोखरेल प्रतिस्पर्धामा उठ्दैछन् । यसअघि प्रतिस्पर्धा गरेका नेपाली कांग्रेसका प्रवक्ता डा. प्रकाशशरण महत भने यसपटक यहाँबाट नउठ्ने भएका छन् ।
प्रतिक्रिया