पर्सा । वीरगन्जमा बेवारिसे अवस्थामा मृत भेटिएका एक युवक सहित ६ जनामा कोरोना संक्रमण पुष्टि भएको छ ।
यहि जेष्ठ २८ गते वीरगन्जको घण्टाघर छेउको विपी उद्यान परिसरमा मृत अवस्थामा भेटिएका अन्दाजी २५ वर्षीय पुरुषको पिसिआर रिपोर्ट पोजेटिभ आएको हो । उनको पहिचान भने खुल्न सकेको छैन । प्रहरीले बेवारिसे अवस्थामा भेटिएको उनको शव नारायणी अस्पतालमा पोष्टमार्टमका लागि पठाएको थियो ।
नारायणी अस्पतालको प्रयोगशालामा गरिएको मृतकको स्वावको पिसिआर परीक्षणमा ती पुरुषको रिपोर्ट शुक्रबार राति पोजिटिभ आएको अस्पतालका चिकित्सक डाक्टर उदयनारायण सिंहले जानकारी दिनुभयो । शवको पोष्टमार्टम रिपोर्ट नआइ सकेकाले ती पुरुषको मृत्युको कारण यकिन हुन नसकेको डाक्टर सिंहले बताउनुभयो । त्यसैगरि निमोनियाले ग्रस्त ५ वर्षीय बालकको वीरगन्ज हेल्थ केयर अस्पतालमा उपचारका क्रममा शुक्रवार मृत्यु भएको छ ।
बाराको निजगढका ५ वर्षीय बालकको उपचारका क्रममा मृत्यु भएको हो । मृत्यु पश्चात उनको आरडिटी परिक्षण गर्दा रिपोर्ट पोजिटिभ आएको छ । निजगढबाट ल्याइएका ती बालकलाई शुक्रबार विहान ११ बजे अस्पतालको इमर्जेन्सीमा भर्ना गरिएको थियो । उनको स्वाब पीसीआर परीक्षणका लागि पठाइएको अस्पतालका सञ्चालक डा।अबुल हैस अन्सारीले बताउनुभयो ।
त्यसैगरि भारतबाट आएका ५ जनामा समेत कोरोना सक्रमणको पुष्टि भएको छ । वीरगन्जको कन्टी इन होटलको क्वारेन्टाइनमा बसेका २ जना र सखुवा प्रसौनी गाँउपालिकाको क्वारेन्टाइनमा बसेका ३ जनामा पनि शुक्रबार राति संक्रमण पुष्टि भएको हो ।
कन्टी इन होटलको क्वारेन्टीनमा १२ दिनदेखि बसेका वीरगन्ज ५ कुम्हाल टोलका ३४ वर्षीय महिला र १९ वर्षीय पुरुषमा संक्रमण पुष्टि भएको हो । उनीहरु दुवै जना एकै परिवारका सदस्य हुन् । त्यसैगरी सखुवा प्रसौनी गाउपालिकाका ३ बर्षीय बालक, १५ बर्षीय किशोर र ३० बर्षीय महिलामा कोरोना सक्रमणको पुष्टि भएको छ।
प्रतिक्रिया