सरकारको भ्रष्टाचार विरोधी अभियानबाट तस्करहरू तर्सिएका छन् : प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहाल प्रचण्डले सरकारको भ्रष्टाचार विरोधी अभियान र कदमबाट राज्य दोहनकर्ता र तस्करहरू तर्सिएका छन्, अत्तालिएको बताएका छन् ।

बिहीबार मन्त्रीहरुसँग कार्यसम्पादान सम्झौता गरेपछि बोल्दै प्रधानमन्त्री प्रचण्डले सरकारको भ्रष्टाचार विरोधी अभियानबाट आत्तिएकाहरुले अनेकौं बखेडा खडा गर्न खोजेको आरोप लगाए । प्रधानमन्त्रीले भने, “सुशासन, सामाजिक न्याय र समृद्विको यात्राका लागि शासकीय संयन्त्र चुस्तदुरूस्त हुनैपर्छ । सरकारका भ्रष्टाचार विरोधी अभियान र कदमबाट पछिल्लो समयमा राज्य दोहनकर्ता र तस्करहरू तर्सिएका छन्, अत्तालिएका छन् ।”

प्रधानमन्त्री प्रचण्डले मुलुकको विकास तथा समृद्विको बाधक भ्रष्टाचार उन्मूलनका लागि सरकारले अझै सशक्त कदम चाल्ने बताएका छन् ।

आफ्नो नेतृत्वमा गठित सरकारले अर्थतन्त्रको पुनरुत्थान, सार्वजनिक सेवा प्रवाहमा सुधार, सामाजिक न्याय, सुशासन र समृद्धिलाई केन्द्रमा राखी आफ्ना सम्पूर्ण शक्ति र सामथ्र्यलाई देश र जनताको हितमा परिचालन गर्न जोड दिँदै आएको उनको भनाइ छ । उनले यसबाट समाजका सबै क्षेत्रमा सकारात्मक भाष्य र सरकारप्रतिको भरोसा बढेर गएको बताए ।