अवरुद्ध संसद खुलाउन प्रतिपक्षी दलहरुसँग संवाद् तिब्र बनाउने सत्ता गठबन्धनको निर्णय

काठमाडौं । सत्तारुढ गठबन्धनले संसदको जारी अवरोध खुलाउन एमालेसहितका प्रतिपक्षी दलहरूसँग संवाद बढाउने निर्णय गरेको छ ।

बुधबार बिहान प्रधानमन्त्री निवास बालुवाटारमा बसेको गठबन्धनको बैठकले संसदको गतिरोध खुलाउन प्रमुख प्रतिपक्षी दल लगायतका दलहरुसँगको संवादलाई तिब्र बनाउने निर्णय गरेको हो ।

बैठकमा प्रधानमन्त्री पुष्पकमल दाहाल प्रचण्ड, कांग्रेस सभापति शेरबहादुर देउवा, एकीकृत समाजवादीका अध्यक्ष माधवकुमार नेपाल, उपप्रधानमन्त्रीहरू पूर्णबहादुर खड्का, नारायणकाजी श्रेष्ठ लगायतका नेताहरू सहभागी थिए ।

यसअघि सोमबार साँझ बसेको गठबन्धन बैठकले एमालेको मागबमोजिम सुनकाण्डबारे छानबिन गर्न उच्चस्तरीय छानबिन समिति आवश्यक नरहेको निस्कर्ष निकालेको थियो ।
एमालेले भने छानिबन समिति नबनेसम्म संसद अवरुद्ध गरिरहने अडान कायमै राखेको छ ।