बुटवल । नेकपा एमालेका प्रमुख सचेतक महेश बर्तौलाले सुन तस्करी प्रकरणमा प्रधानमन्त्रीमाथि समेत छानबिन हुनेपर्ने बताएका छन् ।
बुटवलमा शनिबार बिहान प्रेस चौतारीले आयोजना गरेको पत्रकार भेटघाटमा बर्तौलालले सरकारले सुन तस्करलाई संरक्षण गरेकै कारण उनीहरुमाथि छानबिन हुनुपर्ने बताएका हुन् । उनले सरकार मातहतकै निकायले प्रधानमन्त्री र गृहमन्त्रीलाई छानिबन गर्न नसक्ने उनले तर्क गरे । आफुहरुले माग गरेको उच्चस्तरीय छानबिन समितिले सबैमाथि छानबिन गर्ने उनले बताए ।
उनले भन्सारबाट ३३ पटक सुन भित्रिँदा पनि सोधखोज नभएको बताउँदै हवल्दार र सिपाही , सुब्बा र खरदारको सेटिङमा मात्र सुन भित्रन नसक्ने दाबी गरे । कसैलाई बचाउने कसैलाई फसाउने नियत सरकारमा देखिएको उनले आरोप लगाए ।
बर्तौलाले सरकारले संसदलाई कमजोर बनाएको आरोप लगाएका छन् । ९ महिनासम्म कुनै विजनेश नदिएर सरकारले संसदलाई कमजोर बनाएको आरोप लगाएका हुन् । सांसदले संसदमा उठाएका कुरा नसुन्न सरकारले कानमा तेल र आँखामा पट्टी लगाएर बसेको उनको आरोप छ ।
बर्तौलालले ठूलो दलको हैसियतमा कांग्रेससँग अपेक्षा रहेपनि उसले निकास नदिएको बताए । ‘कांग्रेस फुच्चे माहुतेको पछिपछि लाग्यो’, उनले भने ।
संसदमा आफुहरुलाई सहयोगी दलले छोडेपनि एमालेले आफ्नो एजेण्डा नछोड्ने उनले बताए ।
प्रतिक्रिया