शुक्रबारदेखि माओवादीको स्थायी समिति र केन्द्रीय समितिको बैठक बस्दै

काठमाडौं । नेकपा (माओवादी केन्द्र)ले केन्द्रीय समिति र स्थायी समिति बैठक बोलाएको छ । माओवादीले विधान मस्यौदाबारे छलफल शुक्रबार र शनिबार दिउँसो ३ बजे स्थायी समिति बैठक तथा आइतबार र सोमबार केन्द्रीय समितिको बैठक बोलाएको हो ।

पार्टीको मस्यौदा विधान २०८० माथि छलफल गर्न केन्द्रीय समिति र स्थायी समिति बैठक बोलाएको माओवादीले जनाएको छ । फागुनको पहिलो हप्ता हुन लागेको प्रथम विधान अधिवेशनको तयारीका लागि बैठक बस्न लागिएको पार्टीका केन्द्रीय सचिव गणेश साहले बताए । उपाध्यक्ष पम्फा भुसाल नेतृत्वको मस्यौदा समितिले तयार गरेको मस्यौदा विधानमाथि बैठकमा छलफल हुने सचिव साहले बताए ।

अधिवेशनको तयारीको विषयमा बुधबार अध्यक्ष पुष्पकमल दाहाल प्रचण्डले पदाधिकारीहरूसँग छलफल गरेका थिए । प्रधानमन्त्री निवास बालुवाटारमा भएको छलफलमा विधानलाई चुस्त दुरुस्त बनाउने लगायत प्राविधिक विषयमा छलफल भएको साहले बताए । मस्यौदामाथि तलबाट आएका सुझाव र सल्लाह बैठकमा नै प्रस्तुत गर्ने ब्यवस्था मिलाईएको उनले जानकारी दिए ।

मस्यौदा कार्यदलले बुझाएको मस्यौदामाथि २१ दिन तल्लो समितिमा छलफल भएको बताइएको छ ।