बुटवल । यही चैत २४ देखि बुटवलमा कर्णेल उजिरसिंह थापा स्मृति मेयर कप अन्तर्राष्ट्रिय बुद्धिचाल प्रतियोगिता हुने भएको छ । बुटवल उपमहानगरपालिका बुद्धिचाल संघको आयोजनामा यहि चैत २४ देखि २७ गतेसम्म कर्णेल उजिरसिंह थापा स्मृति मेयर कप अन्तर्राष्ट्रिय बुद्धिचाल प्रतियोगिता हुने भएको हो ।
आयोजकले पत्रकार सम्मेलनको आयोजना गरि प्रतियोगिताको तयारी अन्तिम चरणमा पुगेको जानकारी गराएको छ । चार दिनसम्म चल्ने प्रतियोगितामा सहभागी हुनको लागि नेपाल सहित भारत, बंगलादेश, श्रीलंका, अमेरिकाबाट गरी अहिलेसम्म ११७ जनाले नाम दर्ता गराईसकेका प्रतियोगिता संयोजक माधवप्रसाद प्रधानले जानकारी दिए ।
प्रतियोगितामा ४ सय जनासम्मलाई सहभागी गराउन सकिने बुटवल उपमहानगरपालिका बुद्धिचाल संघका अध्यक्ष सुधिर पुनले जानकारी जानकारी दिए ।
प्रतियोगितामा सहभागी हुनको लागि रुपन्देही जिल्लाका खेलाडीलाई ३ हजार रुपैंयाँ दर्ता शुल्क निर्धारण गरिएको गरिएको छ । त्यस्तै रुपन्देहीका विद्यार्थीलाई २ हजार रुपैंयाँ, रुपन्देही बाहेककालाई ७ हजार रुपैंयाँ र नेपाल बाहिरका खेलाडीलाई १० हजार रुपैंयाँ दर्ता शुल्क निर्धारण गरिएको बुटवल उपमहानगरपालिका बुद्धिचाल संघका अध्यक्ष सुधिर पुनले बताए ।
नेपालमै अहिलेसम्मकै अत्यधिक राशी पुरस्कार रहेको यो प्रतियोगितामा क्याटागोरी अनुसार ५१ जना सहित ७१ जनालाई पुरस्कार प्रदान गरिने छ । प्रतियोगितामा प्रथम हुनेलाई २ लाख रुपैंयाँ नगद पुरस्कार प्रदान गरिने छ । त्यस्तै द्वित्तीय हुनेलाई १ लाख १० हजार रुपैंयाँ, तृतीय हुनेलाई ६० हजार, चौथो हुनेलाई ४० हजार, पाँचौं हुनेलाई ३० हजार रुपैंयाँ नगद पुरस्कार प्रदान गरिने छ ।
त्यस्तैगरी छैठौंदेखि दशौंसम्म आउनेलाई २० हजार, एघारौंदेखि १५ औंसम्म आउनेलाई १५ हजार र १६ औं देखि २० औं स्थानसम्म आउनेलाई १३ हजार रुपैंयाँ नगद पुरस्कार प्रदान गरिने प्रतियोगिताका प्रचारप्रसार संयोजक हरिष ढकालले बताए । त्यस्तैगरी विधागत रुपमा २० वटा विधामा खेल खेलाईने छ । विधागत रुपमा उत्कृष्ट हुनेलाई पुरस्कार प्रदान गरिने उहाँले जानकारी दिनुभयो । विधागत रुपमा २० जनालाई ५१ हजार देखि १० हजार रुपैंयाँ सम्म पुरस्कार प्रदान गरिने छ । यो प्रतियोगितामा कुल १० लाख १ हजार रुपैंयाँ पुरस्कार प्रदान गरिने छ ।
प्रतियोगिता सम्पन्न गर्नको लागि करिव ४६ लाख रुपैंयाँ लाग्ने अनुमान गरिएको छ । जसको लागि बुटवल उपमहानगरपालिकाले १५ लाख रुपैंयाँ प्रदान गरेको छ भने १५ लाख रुपैंयाँ खेलाडी दर्ताबाट संकलन हुने र बाँकी रकम प्रयोजक तथा सहयोग संकलन गरी प्रतियोगिता सम्पन्न गरिने अध्यक्ष पुनले बताए । पत्रकार सम्मेलनमा बोल्दै बुटवल उपमहानगरपालिका खेलकुद विकास समितिका अध्यक्ष बोनिन पिया, पत्रकार महासंघ रुपन्देहीका उपाध्यक्ष विश्वास ढकालले रुपन्देहीमा अन्तर्राष्ट्रिय स्तरको प्रतियोगिता हुनु यस क्षेत्रका लागि गैरवको कुरा भएको बताएका थिए ।
प्रतिक्रिया