काठमाडौं । कोरोना भाइरसको संक्रमणबाट नेपाली कांग्रेसका एक जना नेताको मृत्यु भएको छ ।
नवलपरासी सुस्ता पश्चिमका जिल्ला उपसभापति सुवासचन्द्र गिरीको उपचारको क्रममा आज बिहान पाटन अस्पतालमा मृत्यु भएको हो ।
३८ वर्षीय गिरीलाई कोरोना संक्रमण पुष्टि भएपछि बुटवल कोरोना अस्पतालबाट गत शुक्रबार पाटन अस्पताल ल्याइएको थियो ।
स्वास्थ्य अवस्था गम्भीर बन्दै गएपछि उनको भेन्टिलेटरको सहायतामा उपचार भैरहेको थियो । तर, गएराति ११ बजेदेखि स्वास्थ्यमा थप जटिलता भै बिहान मृत्यु भएको हो ।
उनको भैरहवा मेडिकल कलेजमा केही समय अघि मात्रै पित्त थैलीको अपरेशन भएको थियो ।
गिरीको मृत्युको खबरले नेपाली कांग्रेसका प्रमुख सचेतक बालकृष्ण खाणँ स्तभ्द भएको बताएका छन् । सामाजिक सञ्जाल फेसबुकमा मृतक गिरीप्रति श्रद्धान्जली ब्यक्त गर्दै प्रमुख सचेतक खाँणले शोकाकुल परिवार प्रति समबेदना प्रकट गर्दै स्वर्गीय गिरी प्रति श्रद्धान्जली ब्यक्त गरेका छन् ।
उता, पोखरामा तनहुँकी एक कोरोना संक्रमित महिलाको उपचारकै क्रममा गएराति मृत्यु भएको छ ।
तनहुँ ब्यास–१ अम्रेनीकी ५० वर्षीया महिलाको पोखराको कास्की सेवा अस्पतालमा उपचारको क्रममा ज्यान गएको हो ।
उनलाई साउन २१ गते उपचारका लागि अस्पताल लागिएको थियो ।
ती महिलामा सुगर, पे्रसर, मुटुको समस्या र निमोनिया रहेको कास्की सेवा अस्पतालले जानकारी दियको छ ।
ती महिलालाई गत साउन २१ गते उपचारका लागि पोखरा लगिएको थियो । तर उनको कोरोना पोजेटिभ रिपोर्ट भने अहिले बिहान मात्रै पुष्टि भएको थियो ।
प्रतिक्रिया