नेपालगन्ज । बाँकेमा ब्यवस्थित दाहसंस्कारस्थलको परिकल्पनाका साथ प्रस्ताव गरिएको बैकुण्ठधाम सिधनियाघाट निर्माणका लागि सहयोग जुट्ने अभियानले निरन्तरता पाएको छ । बैकुण्ठधाम निर्माणका लागि आगामी २२ गतेबाट नेपालगन्जमा धार्मिक महोत्सवको आयोजना गरिने भएपनि महोत्सव सुरुहुनु पूर्व नै धमाधम दाताहरुले दान दिन सुरु गरेका छन् ।
आज मात्र बैकुण्ठधाम निर्माणका लागि कोहलपुरबाट रम्भा शर्माबाट १० लाख ११ हजार हस्तान्तरण गरेकी छन् । उनले बैकुण्ठधाम सिधनियाघाट निर्माणमा टेवा पुगोस भन्ने उद्देश्यले महोत्सव पूर्व चेक पठाएको महोत्सव मुल आयोजक समितिका आर्थिक उपसमितिका संयोजक कृष्णप्रसाद श्रेष्ठले जानकारी दिए । आजै नेपालगन्जकी सुशिला शर्माले पनि महोत्सवको सचिवालय पुगेर बैकुण्ठधाम निर्माणका लागि ५ लाख ५५ हजार ५५५ रुपैयाँको चेक हस्तान्तरण गरेकी छन् । उनले मुल समितिका संयोजक डा. सुरेशकुमार कनोडियालाई चेक हस्तान्तरण गरेकी हुन् ।
धार्मिक महोत्सव सुरुहुनु पूर्व नै धमाधम दाताहरुले दान दिन थालेको संयोजक श्रेष्ठले बताए । उनका अनुसार अहिलेसम्ममा ४८ लाख ८४ हजार रकम संकलन भइसकेको छ । त्यसमध्य अधिकांस रकम बैकुण्ठधामको खातामा जम्मा भइसकेको उनले जानकारी दिए । बैकुण्ठधामका लागि मुल समितिका संयोजक डा कनोडियाले १० लाख १ सय १ रुपैयाँ दान गरेका छन् भने कमल कार्कीबाट १ लाख ५१ हजार १५१, राजमन मित्रबाट १ लाख ११ हजार १११, विमल डाँगीबाट १ लाख, संजीव बस्नेतबाट १ लाख १ हजार रुपैयाँ दान प्राप्त भएको श्रेष्ठले जानकारी दिए ।
त्यसैगरि केशवराम बर्माबाट १ लाख ११ हजार १११ र डा. गोपाल प्रसाद शर्माबाट ५१ हजार १०१ प्रदान भएको उनले बताए । उनले धेरै दाताहरुले सचिवालयमा आएर आर्थिक सहयोग गरेको र त्यो क्रम निरन्तर रहेको बताए । महोत्सवको घोषणा भए लगत्तै डा. बद्री चापागाईँले ५ लाख ५५ हजार ५५५ रुपैयाँ प्रदान गरेर आर्थिक संकलनको आरम्भ गरेका थिए ।
दान गरेका दाताहरुलाई पूर्व निर्धारित कार्यक्रम अनुसार धार्मिक महोत्सवमा सम्मान र अभिनन्दन गरिने मुल समितिका महासचिव श्रीराम सिग्देलले बताए । यही कार्तिक २२ गतेबाट ३० गते सम्म बाचन शिरोमणीको उपाधि पाएका पं दीनबन्धु पोखरेलबाट संगीतमय भागवत बाचन सहित धार्मिक महोत्सवको आयोजना हुने महासचिव सिग्देलले बताए ।
प्रतिक्रिया