काठमाडौं । भोलि शनिबारका लागि बोलाइएको सत्तारुढ नेपाल कम्युनिष्ट पार्टी नेकपाको सचिवालय बैठक स्थागित गरिएको छ ।
अब अर्को बैठक आगामी भदौ १८ गते बिहीबार बस्ने मिति तय गरिएको छ ।
पार्टीभित्रको विवाद समाधान गर्न गठित कार्यदलको प्रतिवेदनमाथि छलफल गरी निस्कर्ष निकाल्ने भनिएको बैठक स्थगनको कारण भने खुलाइएको छैन ।
सचिवालय सदस्यहरुलाई बैठक भोलिको स्थगित गरिएको मात्र जानकारी गराइएको छ ।
पाटीभित्र शिर्ष नेतृत्वबीच गम्भीर मतभेद उब्जिएपछि गत असार १० गतेबाट सुरुभएको स्थायी कमिटीको बैठक पनि अलपत्र अवस्थामा छ । स्थायी कमिटी बैठककै बीच असार १६ गतेबाट विवाद सहमा देखिएको थियो ।
प्रधानमन्त्री एवं अध्यक्ष केपी शर्मा ओलीको राजीनामा प्रचण्ड–नेपाल पक्षीय नेताहरुले माग्न थालेपछि बैठक भाँडिएको थियो । बीचबीचमा सचिवालयको निस्कर्षहीन बैठक बसेको थियो ।
विवाद समाधानका लागि अध्यक्षद्वय ओली र प्रचण्डबीच समेत पटकपटक छलफल हुँदै सम्वाद टुट्दै गरेको अवस्थामा विवाद समाधानकै लागि महासचिव विष्णु पौडेलको नेतृत्वमा ६ सदस्यीय कार्यदल बनेको थियो ।
कार्यदलले आफ्नो प्रतिवेदन निर्धारित समयमा नै बुझाइसकेको छ ।
यद्यपी, कार्यदलको प्रतिवेदनमाथि माधव नेपाल र झलनाथ खनाल पक्षीय नेताहरुले असन्तुष्टि जनाएका छन् । तर, कार्यदलमा भने नेपालको तर्फबाट सुरेन्द्र पाण्डे र भीम रावल सदस्य रहेका थिए ।
सर्वसम्मत रुपमा अध्यक्षलाई बुझाएको कार्यदलप्रतिवेदनमाथि थप छलफल गरी निस्कर्ष निकाल्नका लागि भोलिको बैठक बोलाइएको थियो ।
प्रतिक्रिया