काठमाडौं । पूर्वराष्ट्रपति विद्यादेवी भण्डारीले आज विशेष पत्रकार सम्मेलन गर्ने भएकी छिन् । दिउँसो ३ बजे काठमाडौंको कार्की ब्याङ्क्वेटमा उनले पत्रकार सम्मेलन गर्न लागेकी हुन् ।
यो पत्रकार सम्मेलन नेकपा एमालेको केन्द्रीय कमिटी बैठकले आफ्नो पार्टी सदस्यता निस्क्रिय बनाउँदै राजनीतिमा रोक लगाउने निर्णय गरेपछि आफ्नो औपचारिक धारणा सार्वजनिक गर्न लागेकी हुन् ।
हालै सम्पन्न एमाले केन्द्रीय कमिटी बैठकले विद्यादेवी भण्डारीको पार्टी सदस्यता नवीकरण नहुने निर्णय गरेको थियो । पार्टीले संविधान र पार्टी विधानका विभिन्न धारा उल्लेख गर्दै उनलाई फेरि सक्रिय राजनीतिमा फर्कन रोक लगाउने निर्णय गरेको हो ।
राष्ट्रपतिको जिम्मेवारीबाट मुक्त भएपछि उनी केही समयदेखि सार्वजनिक रुपमा गतिविधिमा कम देखिएकी थिइन् । तर पछिल्लो समय पार्टीभित्र उनीबारे व्यापक बहस चल्दै आएको छ ।
भण्डारीले आफ्नो आगामी यात्राबारे पनि आज प्रस्ट पार्ने उनको सचिवालयले जनाएको छ । यसअघि उनले आफू राजनीतिमा आइसकेकोले पछि नहट्ने प्रतिक्रिया दिँदै आएकी थिइन् ।
पत्रकार सम्मेलनमा उनी स्वयंले आफ्नो राजनीतिक भविष्य र पार्टी निर्णयप्रति दृष्टिकोण सार्वजनिक गर्ने अपेक्षा गरिएको छ ।
प्रतिक्रिया