काठमाडौं । आईसीसी टी-२० विश्वकप एसिया-प्यासिफिक क्षेत्रीय फाइनलको सुपर-६ चरणमा लगातार तेस्रो जित निकाल्दै नेपालले उत्कृष्ट प्रदर्शन गरेको छ । बुधबार ओमानको अल अमेरातमा सम्पन्न खेलमा नेपालले घरेलु टोली ओमानलाई ३८ रनले पराजित गर्दै शीर्ष स्थानमा उक्लिएको हो ।
यस जितसँगै नेपालले सुपर-६ चरणमा आठ अंक जोड्दै तालिकाको शिखरमा स्थान बनाएको छ । दोस्रो स्थानमा ६ अंकसहित आयोजक ओमान रहेको छ । नेपालले अब प्रतियोगिताको अन्तिम खेल शुक्रबार समोअविरुद्ध खेल्नेछ ।
नेपालले टस जितेर पहिले ब्याटिङ गर्दै निर्धारित २० ओभरमा नौ विकेट गुमाएर १५१ रनको योगफल बनाएको थियो । कुशल भुर्तेलले उत्कृष्ट अर्धशतक प्रहार गर्दै टोलीको इनिङ्स सम्हाले । उनले ५१ बलमा सात चौका र एक छक्कासहित ६९ रन जोडे । यो भुर्तेलको टी-२० अन्तर्राष्ट्रिय क्रिकेट करिअरको १३औँ अर्धशतक र जारी प्रतियोगिताको दोस्रो अर्धशतक हो ।
ओपनर आसिफ सेखले २० बलमा दुई चौका र एक छक्कासहित २४ रनको योगदान दिए । यी दुईले पहिलो विकेटका लागि ६१ रनको साझेदारी गर्दै नेपाललाई सानदार सुरुआत दिलाएका थिए । गुल्सन झाले ९ बलमा दुई छक्कासहित १८ रन र मोहम्मद आदील आलमले १५ बलमा १६ रन जोडे ।
ओमानका नदीम खानले चार ओभरमा २० रन खर्चेर चार विकेट लिए। सुफयान मेहमुद र जितेन रमानन्दीले समान दुई-दुई विकेट हात पारे ।
१५२ रनको लक्ष्य पछ्याउने क्रममा ओमानले निर्धारित २० ओभरमा नौ विकेट गुमाउँदै ११३ रनमात्र बनाउन सक्यो । ओमानका विनायक शुक्लाले ३२ रन, मोहम्मद नदीमले २५ रन, कप्तान जतिन्दर सिंहले १४ रन र आर्यन बिष्टले ११ रन बनाए ।
नेपालका गुल्सन झाले तीन विकेट लिए भने सोमपाल कामी र नन्दन यादवले दुई-दुई विकेट झारे । सन्दीप लामिछानेले एक विकेट हात पारे ।
यसअघि नेपालले सुपर-६ चरणमा यूएईविरुद्ध एक रन र कतारविरुद्ध पाँच रनको जित निकालेको थियो । समूह चरणमा नेपालले कुवेतलाई ५८ रनले र जापानलाई पाँच विकेटले हराएको थियो ।
नेपालले यसअघि नै आगामी वर्ष हुने टी-२० विश्वकपमा स्थान सुनिश्चित गरिसकेको छ । समग्रमा नेपाल तेस्रो पटक विश्वकपमा सहभागी हुन लागेको हो । यसअघि नेपालले सन् २०१४ र २०२४ मा टी*२० विश्वकप खेलेको थियो ।
ओमानले पनि विश्वकपका लागि आफ्नो स्थान पक्का गरिसकेको छ ।
प्रतिक्रिया