काठमाडौं । आईसीसी टी-२० विश्वकप एसिया प्यासिफिक क्षेत्रीय फाइनलको सुपर-६ मा नेपालले आज आफ्नो अन्तिम खेल खेल्दै छ । लगातार तेस्रो जित निकालेको नेपालले आज प्रतियोगिताको अन्तिम खेल सामाओविरुद्ध खेल्दै छ । नेपालले सामाओविरुद्ध जित निकाले विश्वकपको टिकट प्रतियोगिताको उपाधिसमेत घर ल्याउनेछ ।
दुई खेल अगावै विश्वकपमा स्थान पक्का गरेको नेपाल उपाधिको एक कदम टाढा छ । बुधबार राति बलियो टिम ओमानलाई ३८ रनले हराएपछि नेपालको उपाधि जित्ने सम्भावना अझ बलियो बनेको हो ।
सुपर सिक्सको अंक तालिकामा नेपाल ८ अंकसहित शीर्ष स्थानमा रहेको छ । दोस्रो र तेस्रो स्थानमा क्रमशः यूएई र ओमान ६-६ अंकसहित छन् । यूएईको खेल सकिए पनि ओमानले आजै अन्तिम खेलमा जापानसँग प्रतिस्पर्धा गर्दैछ ।
नेपालले आज शुक्रबार सामाओलाई पराजित गर्न सके अपराजित रहँदै १० अंकसहित छनोटको उपाधि हात पार्नेछ । नेपाल, ओमान र यूएईले यसअघि नै विश्वकपमा आफ्नो स्थान पक्का गरिसकेका छन् ।
आजको खेल नेपालका लागि फाइनल सरह हुनेछ । नेपाल शीर्ष स्थानमा छ भने सामाओ कुनै अंक बिना पुछारमा छ । कप्तान रोहित पौडेलले ओमानमाथिको जितपछि अबको लक्ष्य उपाधि जित्ने रहेको बताएका छन् ।
तेस्रो पटक विश्वकपमा छनोट भएको नेपाल पहिलो पटक छनोट चरणको उपाधि उचाल्ने तयारीमा छ । उपाधिका लागि नेपालले आज दिउँसो ४:१५ बजे ओमानको अल अमेरात मैदानमा सामाओसँग प्रतिस्पर्धा गर्नेछ ।
यदि नेपालले सामाओलाई पराजित गर्न सके उपाधि अपराजित रहँदै आफ्नो नाममा राख्नेछ । नेपाल पराजित भई ओमानले जापानलाई हराएमा भने रनरेटका आधारमा शीर्ष स्थानमा रहेको टोली विजेता हुनेछ । तर ओमान जापानसँग पराजित भए नेपालले सामाओसँगको खेल नतिजा जे भए पनि उपाधि जित्नेछ ।
जापान र ओमानबीचको खेल आज बिहान ११:४५ बजेबाट सुरु हुँदैछ ।
प्रतिक्रिया