काठमाडौं । आईसीसी टी-२० विश्वकप एसिया तथा इस्ट एसिया-प्यासिफिक छनोटअन्तर्गत सामाओविरुद्धको खेलमा नेपालले शानदार प्रदर्शन गर्दै २ सय १२ रनको विशाल लक्ष्य दिएको छ ।
ओमानको अल अमिरातस्थित ओमान क्रिकेट एकेडेमी टर्फ-१ मैदानमा सामोआले टस जितेर फिल्डिङ रोजेपछि पहिले ब्याटिङ गरेको नेपालले निर्धारित २० ओभरमा ४ विकेट गुमाउँदै २ सय ११ रनको योगफल बनायो ।
नेपालका ओपनर आसिफ शेख र मिडल अर्डर ब्याटर दीपेन्द्रसिंह ऐरीले उत्कृष्ट अर्धशतक प्रहार गरे । आसिफले ४१ बलमा ६९ रन बनाउँदै ४ छक्का र ७ चौका हाने, भने ऐरीले ३३ बलमा ५३ रन जोडे । उनले ४ छक्का र २ चौका प्रहार गरे ।
नेपालले आजको खेल जितेमा अपराजित रहँदै छनोट प्रतियोगिताको उपाधि हात पार्नेछ । समूह चरणदेखि सुपर सिक्ससम्म नेपाल एक मात्र अपराजित टोली हो ।
यता, सामाओले सुपर सिक्स चरणमा अहिलेसम्म कुनै खेल जित्न सकेको छैन ।
आजको खेलमा नेपालका कप्तान रोहित पौडेलको नेतृत्वमा आसिफ शेख, कुशल भुर्तेल, लोकेश बम, दीपेन्द्रसिंह ऐरी, आरिफ शेख, गुल्सन झा, नन्दन यादव, करण केसी, सन्दीप लामिछाने र ललित नारायण राजवंशी मैदानमा उत्रिएका छन् ।
प्रतिक्रिया