काठमाडौं । पूर्व-पश्चिम राजमार्गअन्तर्गत नारायणगढ-बुटवल सडकखण्डमा पर्ने नारायणी नदीको पुल आज (शुक्रबार) र भोलि (शनिबार) राति सवारी आवागमनका लागि बन्द हुने भएको छ ।
नारायणगढ-बुटवल सडक आयोजनाले जारी गरेको सूचनामा चितवन र नवलपरासी (बर्दघाट-सुस्ता पूर्व) जोड्ने नारायणी पुलको गैँडाकोटतर्फको लेनमा कालोपत्रे (ब्ल्याकटप) कार्य गर्नुपर्ने भएकाले रातिको समयमा यातायात बन्द गर्न लागिएको उल्लेख छ ।
आयोजनाका अनुसार दुवै दिन राति ११ बजेदेखि बिहान ४ बजेसम्म पुलमा सवारीसाधन सञ्चालन पूर्ण रूपमा रोकिनेछ । निर्धारित समयावधिमा यात्रु तथा चालकहरूले वैकल्पिक मार्ग प्रयोग गर्न र आवश्यक परे तोकिएको स्थानमा सवारी रोकेर पालो पर्खन अनुरोध गरिएको छ ।
आयोजनाले पुलको मर्मत तथा स्तरोन्नति कार्य प्रभावकारी रूपमा सम्पन्न गराउने उद्देश्यले सवारी आवागमन रोकिएको बताएको छ ।
प्रतिक्रिया