काठमाडौं । गृह मन्त्रालयले १२ जिल्लाका प्रमुख जिल्ला अधिकारी (सीडीओ)हरूको सरुवा तथा जिम्मेवारी हेरफेर गरेको छ । मन्त्रालयले शुक्रबार एक सूचना जारी गर्दै विभिन्न जिल्लामा कार्यरत सीडीओहरूको सरुवा तथा पदस्थापन गरेको जानकारी दिएको हो । साथै कारागार व्यवस्थापन विभागको महानिर्देशकसमेत परिवर्तन गरिएको छ ।
सूचनाअनुसार कारागार व्यवस्थापन विभागको महानिर्देशकमा शशीधर घिमिरेलाई जिम्मेवारी दिइएको छ । यसअघि उनी गृह मन्त्रालयअन्तर्गत अन्य महत्वपूर्ण जिम्मेवारीमा कार्यरत थिए ।
त्यसैगरी जिल्ला प्रशासन कार्यालय भोजपुरको प्रमुख जिल्ला अधिकारीमा राजन पौडेललाई खटाइएको छ । पर्वत जिल्लाको प्रमुख जिल्ला अधिकारीको जिम्मेवारी लक्ष्मीप्रसाद पौडेललाई दिइएको छ भने खोटाङ जिल्लामा रेखा कँडेललाई सीडीओका रूपमा पठाइएको छ । त्यस्तै, प्युठान जिल्लाको प्रमुख जिल्ला अधिकारीमा शान्ति राज प्रसाईंलाई जिम्मेवारी दिइएको छ ।
गृह मन्त्रालयका अनुसार बाँकी जिल्लाहरूमा पनि प्रशासनिक आवश्यकताअनुसार सरुवा गरिएको हो । सुरक्षा व्यवस्थापन, सेवा प्रवाहलाई प्रभावकारी बनाउने तथा प्रशासनिक कार्यलाई चुस्त बनाउने उद्देश्यले नियमित सरुवा गरिएको मन्त्रालयको भनाइ छ ।
हालै विभिन्न जिल्लामा शान्ति सुरक्षा, विकास निर्माण तथा प्रशासनिक समन्वयलाई प्रभावकारी बनाउने उद्देश्यले गृह मन्त्रालयले प्रमुख जिल्ला अधिकारीहरूको कार्यसम्पादनको समीक्षा गर्दै आएको छ । सोही प्रक्रिया अन्तर्गत यो सरुवा गरिएको बताइएको छ ।
प्रतिक्रिया