काठमाडौं । जनता समाजवादी पार्टी (जसपा) नेपालले पुष २३ गतेभित्र प्रतिनिधिसभा सदस्य निर्वाचनका लागि प्रत्यक्षतर्फका उम्मेदवारको नामावली पठाउन निर्देशन पार्टी कमिटीहरुलाई दिएको छ ।
जसपा नेपालले पुष १६ गते परिपत्र जारी गर्दै तोकिएको समयसीमाभित्र पठाउन प्रदेश र जिल्ला कमिटीलाई निर्देशन दिएको हो । निर्देशनमा पार्टी विधानको धारा ११७ को उपधारा (३) अनुसार उम्मेदवार सम्बन्धी मापदण्ड तथा योग्यता पूरा गर्ने योग्य व्यक्तिहरूमध्येबाट उम्मेदवार छनोट गरी नामावली पठाउन भनिएको छ ।
परिपत्रअनुसार प्रत्येक प्रतिनिधि सभा क्षेत्रीय समितिको निर्णयसहित उम्मेदवारहरूको नामावली संकलन गरी रायसहित सात दिनभित्र अनिवार्य रूपमा पार्टी केन्द्रीय कार्यालयमा पुग्ने गरी पठाउनुपर्ने छ । सिफारिस गरिएका उम्मेदवारहरूको राजनीतिक पृष्ठभूमि तथा पार्टीमा पुर्याएको योगदानसमेत स्पष्ट रूपमा उल्लेख गर्न निर्देशन दिइएको छ।
उम्मेदवारहरूको अन्तिम टुंगो संघीय संसदीय बोर्डले लगाउनेछ ।
प्रतिक्रिया