काठमाडौं । नेपाली कांग्रेसको केन्द्रीय कार्यसमितिको भर्चुअल बैठकले आगामी प्रतिनिधिसभा निर्वाचनका लागि तयार गरिएको ‘प्रतिज्ञापत्र’ सर्वसम्मत रूपमा पारित गरेको छ । बुधबार बसेको बैठकले चुनावी घोषणापत्रको रूपमा ल्याउन लागिएको उक्त प्रतिज्ञापत्र अनुमोदन गरेको हो ।
पार्टीले २१ फागुनमा हुने प्रतिनिधिसभा निर्वाचनलाई लक्षित गर्दै ‘प्रतिज्ञापत्र’ सार्वजनिक गर्न लागेको हो । सो प्रतिज्ञापत्र आजै जनकपुरको तिरहुतियामा आयोजना हुने पहिलो चुनावी सभामा सार्वजनिक गरिने कार्यक्रम तय भएको छ ।
पार्टीका अनुसार उक्त सभामा पार्टी सभापति गगन थापाले प्रतिज्ञापत्र सार्वजनिक गर्नेछन् । कार्यक्रम दिउँसो २ बजेदेखि सुरु हुने र त्यसका लागि आवश्यक सम्पूर्ण तयारी पूरा भइसकेको मधेस प्रदेश समितिले जनाएको छ ।
यसअघि नै कांग्रेसले ‘भिजन १०’ को अवधारणामा आधारित घोषणापत्र ल्याउने निर्णय सार्वजनिक गरिसकेको थियो । सोही अवधारणाअनुसार तयार गरिएको प्रतिज्ञापत्रमार्फत पार्टीले आगामी निर्वाचनमा आफ्ना नीति, योजना र प्रतिबद्धताहरू मतदातामाझ प्रस्तुत गर्ने जनाएको छ ।
प्रतिक्रिया