काठमाडौं । प्रतिनिधिसभा सदस्य निर्वाचन अन्तर्गत आज मध्यरातदेखि मौन अवधि सुरु हुने भएको छ । निर्वाचन आयोगका अनुसार राजनीतिक दल तथा उम्मेदवारले आजसम्म मात्र निर्वाचन प्रचारप्रसार गर्न पाउनेछन् ।
आयोगले सोमबार राति १२ बजेदेखि मौन अवधि सुरु हुने जानकारी दिँदै यस अवधिमा निर्वाचन प्रचारप्रसार तथा यससँग सम्बन्धित कुनै पनि गतिविधि पूर्ण रूपमा निषेध गरिएको जनाएको छ । आयोगका अनुसार मौन अवधि मतदान हुने दिनको अघिल्लो ४८ घण्टादेखि मतदान सम्पन्न भई मतदान केन्द्र बन्द नहुन्जेलसम्म अनिवार्य रूपमा पालना गर्नुपर्ने हुन्छ ।
मौन अवधिमा कुनै पनि प्रकारका सभा, सम्मेलन, अन्तर्क्रिया, गोष्ठी, कार्यशाला तथा मतदातालाई प्रभावित पार्ने गतिविधि गर्न पाइँदैन । साथै कुनै पनि माध्यमबाट मत माग्ने, प्रचार सामग्री वितरण गर्ने वा मतदातालाई प्रभावित गर्ने कार्य पनि निषेध गरिएको छ ।
निर्वाचन आयोगले मतदान स्थलको तीन सय मिटर वरिपरि राखिएका राजनीतिक दल वा उम्मेदवारका झण्डा, ब्यानर, पोस्टर लगायतका प्रचार सामग्री मतदान हुनुभन्दा ४८ घण्टाअघि नै हटाउन निर्देशन दिएको छ ।
कार्यवाहक प्रमुख निर्वाचन आयुक्त रामप्रसाद भण्डारीले मौन अवधिमा आचारसंहिता उल्लंघन गर्ने उम्मेदवार वा राजनीतिक दलमाथि कडा कारबाही गरिने चेतावनी दिएका छन् । उनले तोकिएको नियमविपरीत गतिविधि गरेमा सम्बन्धित उम्मेदवारको मनोनयन नै रद्द हुन सक्ने स्पष्ट पारे ।
निर्वाचन आयोगले स्वच्छ, निष्पक्ष र मर्यादित निर्वाचन सुनिश्चित गर्न सबै राजनीतिक दल, उम्मेदवार तथा मतदातालाई मौन अवधिको पूर्ण पालना गर्न आग्रह गरेको छ ।
प्रतिक्रिया