काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले सार्वजनिक जग्गा संरक्षण तथा अनधिकृत संरचना हटाउने अभियान मानवीय मूल्य र मान्यतालाई आत्मसात् गर्दै अघि बढाइने स्पष्ट पारेकी छन् ।
सामाजिक सञ्जालमार्फत धारणा सार्वजनिक गर्दै उनले सरकारको निर्णय र जिल्ला प्रशासन कार्यालयको अनुरोधअनुसार भइरहेको अभियानमा महानगरले सहयोगी भूमिका निर्वाह गर्ने बताएकी छन् । साथै वैशाख ११ गते नगर कार्यपालिकाका सदस्यहरूसँग भएको छलफलको मार्गनिर्देशनलाई आधार मानेर आफ्नो धारणा सार्वजनिक गरिएको उल्लेख गरेकी छन् ।
डंगोलले संरचना हटाउने क्रममा मानवीय मर्यादाको पूर्ण पालना गरिने बताउँदै ज्येष्ठ नागरिक, बिरामी, गर्भवती महिला, बालबालिका तथा अपाङ्गता भएका व्यक्तिहरूको विशेष ख्याल राखिने जानकारी दिएकी छन् । उनले सकेसम्म विवादरहित, सुरक्षित र न्यायपूर्ण ढंगले व्यवस्थापन गरिने र कानुनविपरीत कुनै कार्य नगर्ने प्रतिबद्धता व्यक्त गरिन् ।
महानगरपालिकाले सरकारी, ऐलानी, पर्ति तथा सामुदायिक जग्गा संरक्षण गर्दा कानुन र न्यायको पालना गर्दै अधिकतम प्रयास गरिरहेको पनि उनले बताइन् ।
अभियान सफल बनाउन सरोकारवाला निकाय, पदाधिकारी तथा सर्वसाधारणलाई आवश्यक सहयोग र समन्वयका लागि उनले अनुरोधसमेत गरेकी छन् ।
प्रतिक्रिया