काठमाडौं । नेपाली कांग्रेसको संस्थापनइतर समूहले पार्टीभित्र बृहत्तर एकता कायम गर्दै १५औँ महाधिवेशनलाई निष्पक्ष, पारदर्शी र विश्वसनीय बनाउन तीनबुँदे प्रस्ताव अघि सारेको छ।
इतर समूहका तर्फबाट आयोजित पत्रकार सम्मेलनमा नेता प्रकाशशरण महतले पार्टीको आन्तरिक विवाद समाधान र महाधिवेशनको वातावरण निर्माणका लागि साझा संयन्त्र गठन आवश्यक रहेको बताएका हुन्।
महतले १४औँ महाधिवेशनबाट निर्वाचित संरचना र विशेष महाधिवेशनबाट बनेको वर्तमान नेतृत्वबीच समझदारी कायम गरी १५औँ महाधिवेशनको तयारीका लागि नयाँ संयन्त्र गठन गर्न प्रस्ताव गरेका छन्। त्यस्तै, लामो समयदेखि विवादमा रहेको क्रियाशील सदस्यताको विषय टुंग्याउने तथा विधान संशोधनका सवालमा साझा सहमति कायम गरेर अघि बढ्नुपर्ने उनको भनाइ छ।
उनले केही औपचारिक भेटघाटले मात्रै पार्टीभित्रको एकता सुदृढ हुन नसक्ने उल्लेख गर्दै निरन्तर संवाद र विश्वासको वातावरण आवश्यक रहेको बताए। इतर समूहले कुनै पद वा भागबन्डाको माग नगरेको स्पष्ट पार्दै उनले आफूहरू १५औँ महाधिवेशन निष्पक्ष हुने सुनिश्चितता मात्रै खोजिरहेको बताए।
“हामीले भाग खोजेका होइनौँ, ग्यारेन्टी खोजेका हौँ,” महतले भने, “महाधिवेशन सञ्चालन, क्रियाशील सदस्यता व्यवस्थापन र विधान संशोधनका विषयमा साझा संयन्त्र बनेमा मात्रै महाधिवेशनप्रति सबै पक्षको स्वामित्व र विश्वास कायम हुन्छ।”
विशेष महाधिवेशनबाट बनेको वर्तमान समिति पार्टीभित्र सर्वशक्तिमान हुन नसक्ने उनको तर्क छ। १५औँ महाधिवेशनबाट निर्वाचित नेतृत्व मात्रै सबै पक्षबाट स्वीकार्य र वैधानिक रूपमा बलियो हुने उनले बताए।
क्रियाशील सदस्यताको डिजिटल नवीकरण प्रक्रियाप्रति पनि महतले असन्तुष्टि व्यक्त गरे। उनले वर्षौँदेखि पार्टीमा सक्रिय रहेका नेता तथा कार्यकर्तालाई प्राविधिक प्रक्रियाका नाममा सदस्यताबाट वञ्चित गर्न नहुने बताए। यसअघि नै सदस्यता नवीकरण गरिसकेकाहरूलाई डिजिटल प्रणालीका कारण बाहिर राख्ने प्रयास उचित नहुने उनको भनाइ थियो।
महतले कांग्रेस अहिले चुनौतीपूर्ण अवस्थामा रहेको उल्लेख गर्दै पार्टीभित्रको एकता मजबुत बनाउन नेतृत्वले गम्भीर पहल गर्नुपर्ने बताए। पार्टीका कतिपय नेता–कार्यकर्ता निष्क्रिय बन्दै गएको र केहीले पार्टीसमेत छाडिरहेको अवस्थामा बृहत्तर एकताको आवश्यकता झन् बढेको उनको भनाइ छ।
उनले नेतृत्व पक्षलाई एकताका लागि ठोस पहल गर्न आग्रह गर्दै १५औँ महाधिवेशनलाई सबै पक्षले अपनत्व महसुस गर्ने गरी सम्पन्न गर्नुपर्नेमा जोड दिए।
प्रतिक्रिया