काठमाडौं । २० औँ एसियाली खेलकुदअन्तर्गत पुरुष क्रिकेटका खेल आजदेखि सुरु हुँदैछन् । जापानको आइचीस्थित निशिनमा रहेको कोरोगी स्पोर्ट्स पार्कमा पुरुष क्रिकेटका खेल सञ्चालन हुनेछन् ।
आज दुई खेल हुनेछन् । समूह ‘ए’ अन्तर्गत पहिलो खेलमा बिहान पौने ६ बजे अफगानिस्तान र आयोजक जापानबीच प्रतिस्पर्धा हुनेछ । यस्तै, समूह ‘बी’ अन्तर्गत दोस्रो खेलमा बिहान पौने ११ बजे हङकङ र मलेसिया आमनेसामने हुनेछन् ।
प्रतियोगितामा नेपालको पहिलो खेल भने शुक्रबार हुनेछ । नेपालले समूह ‘ए’ को खेलमा शुक्रबार बिहान पौने ११ बजे अफगानिस्तानसँग प्रतिस्पर्धा गर्नेछ ।
नेपाल समूह ‘ए’ मा अफगानिस्तान र जापानसँगै रहेको छ । तीन टोली रहेको समूहबाट कम्तीमा एक खेल जिते नेपाललाई क्वार्टरफाइनल प्रवेशको सम्भावना बलियो हुनेछ ।
क्वार्टरफाइनलमा प्रवेश गरे नेपालले भारत वा श्रीलंकामध्ये एक टोलीसँग प्रतिस्पर्धा गर्नेछ । यसअघिको एसियाली खेलकुदमा पनि नेपाल क्वार्टरफाइनल पुगेको थियो । त्यतिबेला नेपाल भारतसँग पराजित भएको थियो ।
प्रतिक्रिया