नेपालगन्ज । बाँकेमा कोरोना संक्रमणबाट नेपाली कम्युनिष्ट आन्दोलनका पुराना नेता चन्द्र भुषालको मृत्यु भएको छ । नेपालगन्ज स्थित भेरी अस्पतालमा उपचारका क्रममा आज साँझ ५ः३० बजे भुषालको मृत्यु भएको हो ।
गत कार्तिक २९ गते स्वास्थ्यमा समस्या देखिएपछि नेपालगन्ज मेडिकल कलेजको प्रयोगशालामा पीसीआर परीक्षण गराएका भुषालको ३० गते साँझ कोरोना संक्रमण पुष्टि भएको रिपोर्ट आएको थियो । संक्रमण पुष्टि भएपछि होम आइसोलेसनमा बसेका उनलाई श्वासप्रश्वासमा समस्या भएपछि आज बिहान नेपालगन्ज मेडिकल कलेज कोहलपुर भर्ना गरिएको थियो । समस्या जटिल बन्दै गएपछि थप उपचारका लागि नेपालगन्ज स्थित भेरी अस्पतालमा पु¥याए लगत्तै अस्पतालले भुषाललाई मृत घोषणा गरेको थियो । उनको ५ः१५ बजे मृत्यु भएको जिल्ला कोभिड १९ संकट ब्यवस्थापन केन्द्र(डीडीएमसी)बाँकेका कोरोना फोकलपर्शन नरेश श्रेष्ठले जानकारी दिए ।
लामो समय प्रवासी नेपाली समाज मार्फत राजनिती गरेको भुषाल बिगत ३० वर्ष देखि कोहलपुर नगरपालिका ३ तीनघरुवामा स्थायीरुपमा बस्दै आएका थिए । नेकपा मालेबाट राजनितीमा होमिएका भुषाल केहि समय जनसाँस्कृतिक मञ्च र पार्टीको बिभिन्न जिम्मेवारीमा रहेर काम गर्दै आएका थिए । हाल उनी नेपाल कम्युनिष्ट पार्टी (नेकपा)मा रहेर क्रियाशिल थिए ।
भुषालको मृत्यु भएसँगै बाँकेमा मृत्यु हुनेको संख्या ३७ पुगेको छ ।
प्रतिक्रिया