काठमाडौं । चिनियाँ स्टेट काउन्सिलर तथा रक्षामन्त्री वेइ फेङ एक दिने नेपाल भ्रमणको सिलसिलामा आज आठमाडौं आउँदै छन् ।
गत वर्ष असोजमा चिनियाँ राष्ट्रपति सी चिनफिङले नेपाल भ्रमण गरेपछि चिनियाँ उच्च अधिकारीले गर्न लागेको यो पहिलो नेपाल भ्रमण हो ।
भ्रमणका क्रममा उनले राष्ट्रपति विद्यादेवी भण्डारी एवं प्रधानमन्त्री केपी ओलीसँग शिष्टाचार भेट तथा प्रधानसेनापति पूर्णचन्द्र थापासँग भेटवार्ता गर्ने कार्यक्रम रहेको परराष्ट्र मन्त्रालयले जनाएको छ । एक दिनका लागि नेपाल आउने वेइ आइतबार साँझ बंगलादेश प्रस्थान गर्नेछन् ।
भारतीय विदेश सचिव हर्षवर्धन श्रृंगला नेपालको दुई दिने औपचारिक भ्रमण सम्पन्न गरेर शुक्रबार साँझ स्वदेश फर्किएका छन् । शक्तिशाली दुई छिमेकी देशका महत्वपूर्ण प्रतिनिधिको भ्रमणलाई महत्वका साथ हेरिएको छ ।
भारतीय विदेश सचिवले भ्रमणका क्रममा राष्ट्रपति विद्यादेवी भण्डारी, प्रधानमन्त्री केपी ओली, परराष्ट्रमन्त्री प्रदिपकुमार ज्ञवाली, नेपालका समकक्षी भरतराज पौड्याल र उच्च राजनीतिक नेतृत्वसँग भेट गरेका थिए भने गोरखा पुगेका उनी शुक्रबार साँझ स्वदेश फर्किए ।
भारतका विदेशमन्त्री स्वदेश फर्किए लगत्तै हुन लागेको चिनियाँ रक्षामन्त्रीको भ्रमणलाई महत्वका साथ हेरिएको छ ।
चीन र भारतबीच लद्दाखमा सीमा विवादलाई लिएर तनाव बढिरहेका बेला दुवै देशका उच्चअधिकारीले एकपछि अर्को गर्दै नेपाल भ्रमण गर्नुलाई अर्थपूर्ण रूपमा हेरिएको छ ।
उनको भ्रमणलाई राजनीतिक सन्तुलन मिलाउने कसरतका रुपमा समेत व्यख्या गरिएको छ । भारतले निरन्तर नेपालको सम्बन्धलाई लिएर चीनमाथि उठाएको चासो र नेपाल र भारतका उच्च प्रतिनिधिको लगातार भइरहेको भ्रमणलाई मध्यनजर गर्दै चिनियाँ पक्षले वेईलाई नेपाल भ्रमण पठाएको विज्ञको अनुमान छ ।
चिनियाँ रक्षामन्त्रीको नेपाल भ्रमण राजनीतिक भेटवार्तामा केन्द्रित देखिन्छ । उनले सैनिक मुख्यालय जंगी अड्डामा केही समय बिताउने छन् भने राष्ट्रपति र प्रधानमन्त्रीसँगको भेटलाई प्राथमिकता दिएका छन् ।
उनको भ्रमणमा चीनले नेपाललाई गर्दै आएको सहयोगको विषयमासमेत छलफल हुने बताइएको छ ।
प्रतिक्रिया