रुकुम । प्रचण्ड-नेपाल नेकपाका नेता जनार्दन शर्माले प्रधानमन्त्री केपी शर्मा वलीले जनताको अधिकार खोसेको बताएका छन् ।
रुकुम पश्चिमको चौरजहारीमा आयोजित खानेपानी उद्घाटन सभालाई सम्बोधन गर्दै पुर्व मन्त्री शर्माले जनताको ठुलो त्याग तपस्या र वलिदानबाट प्राप्त संविधानमा समेटिएका मौलिक हक माथि ओलीले धावा बोलेर प्रतिगमन गरेको आरोप लगाए । शर्माले ओलीको प्रतिगमन धेरै दिन नटिक्ने दाबी पनि गरे ।
महिला, दलित, आदिवासी, जनजाती, सिमान्तकृत, समुदाय, धर्म, वर्ण, अपांगता भएका व्यक्ति, जेष्ठ नागरिक लगायत समानुपातिक समावेशी समेटेर लेखिएको संविधानलाई ओलीले च्यात्न खोजेको भन्दै उनले आक्रोश व्यक्त गरे ।
शर्माले सेटिङ्ग र भ्रष्टाचारमा लिप्त ओली सरकार अहिले सम्मकै कलंकित सरकारको रुपमा सावित भएको आरोप लगाए ।
फरक प्रसंगमा बोल्दै पूर्वमन्त्री समेत रहेका नेता शर्माले अबको यात्रा संवृद्धिको भएकोले आम जनताले उत्पादनमा जोड दिनुपर्ने धारणा राखे । उनले कृषि, फलफूल, पशुपालन र उद्योग स्थापनाले रोजगारी सृजना गर्ने वाह्य आयातलाई नियन्त्रण गरी निर्यात गर्न सहयोग पुर्याउने भएकाले समुहमार्फत काम गरी उत्पादनमा जुटन सुझाव दिए ।
आत्मनिर्भर टोल, आत्मनिर्भर वडा/पालिका, प्रदेश र सिंगो देशलाई संवृद्धिको दिशामा लैजान रुकुमबाट नै सहुलियत पुर्ण क्रृण लगानीको कार्य थालनी गरेको उनले बताए । कृषक सहकार्य समुहमार्फत इमान्दारी र कडा मेहनत गरेको खण्डमा आगामी दिनमा थप सहुलितयपुर्ण क्रृण लगानीको लागि आफुले पहल गर्ने उनले आश्वासन समेत दिए ।
कार्यक्रममा सहभागी अर्थविद डाक्टर सुरेन्द्र उप्रेती, राष्ट्रिय वाणिज्य वैंक केन्द्रीय कार्यालयका डेपुटी अधिकृत कविराज अधिकारी, लगायतका अतिथिहरुले समेत कृषकहरुलाई उत्पादनमा जुटन जोड दिएका थिए ।
प्रतिक्रिया