काठमाडौं । प्रधानमन्त्री केपी शर्मा ओलीले आफुलाई रहर लागेर मृगौलाको उपचार गर्न विदेश नगएको बताएका छन् ।
विश्व मृगौला दिवसका अवसरमा काठमाडौंमा आयोजित चेतनाममूलक प्रभातफेरीपछि आयोजित कार्यक्रममा बोल्दै प्रधानमन्त्री ओलीले देशमा विशेषज्ञ सेवा नभएकै कारण आफु विदेश जान बाध्य भएको बताए ।
ओलीले आफ्नो पहिलोपटक मृगौला प्रत्यारोपणको स्मरण गर्दै भने ‘केही मानिसहरुले मलाई ‘बाहिर गएर उपचार गरायो’ भने, तर म रहरले वा बाहिर पैसा बुझाउनका लागि गएको थिइन, यहाँ सुविधा नहुँदा गएको थिएँ ।’
प्रधानमन्त्री ओलीले नेपालमा मृगौलासम्बन्धी विशेषज्ञ सेवा छिटै प्रारम्भ हुने पनि बताए । त्यस्तो केन्द्र स्थापना गर्न मृगौलाविद् एवं चिकित्साशास्त्र अध्ययन संस्थानकी डिन प्राध्यापक डा. दिव्या सिंह शाह सहितका विज्ञहरु क्रियाशिल रहेको उनले जानकारी समेत दिए । प्राध्यापक शाह ओलीका निजी चिकित्सक पनि हुन् ।
प्रधानमन्त्री ओलीले दुई पटक मृगौला प्रत्यारोप गरेका छन् । गत वर्ष शाहकै टिमले त्रिवि शिक्षण अस्पताल महाराजगन्जमा ओलीको दोस्रो पटक मृगौला प्रत्यारोपण गरेको थियो ।
‘मिर्गौला रोगको साथमा स्वस्थ जीवन’ को नारासहित आज नेपालसहित विश्वभर मिर्गौला दिवस मनाइँदैछ ।
प्रतिक्रिया