काठमाडौं । नेकपा एमालेका ११ जना स्थायी कमिटी सदस्यहरुले अध्यक्ष एवं प्रधानमन्त्री केपी शर्मा ओलीले कम्युनिष्ट आन्दोलन ध्वंस गर्न लागेको आरोप लगाएका छन् ।
माधव नेपाल पक्षधर ११ जना स्थायी कमिटी सदस्यहरुले ओलीले पार्टी र सिंगो कम्युनिष्ट आन्दोलनलाई नै ध्वंस गराउन लागेको बताएका हुन् । जनताले पाँच वर्षका लागि निर्वाचित गरेको प्रतिनिधि सभालाई अवैधानिक किसिमले विघटन गर्ने निर्णय बदर भएपछि उत्तेजित बनेका ओलीले राज्यका विभिन्न निकायलाई निकम्मा बनाएको उनीहरुले जिकिर गरेका छन् ।
ओलीद्वारा नेकपा एमाले विभाजित गरी कम्युनिस्ट आन्दोलनलाई ध्वस्त गर्ने षडयन्त्रपूर्ण काम भइरहेको आरोप उनीहरुले लगाएका छन् ।
मंगलबार सम्पन्न ११ जना नेताहरुको बैठकले ओलीले राज्यसत्ताको दुरुपयोग गर्दै पार्टीमा तानाशाही लाद्ने काम गरेको आरोप समेत लगाएका छन् ।
बैठकपछि जारी विज्ञप्तिमा भनिएको छ, ‘प्रधानमन्त्री एवं अध्यक्ष ओलीद्वारा एकपछि अर्को गर्दै निरंकुश र स्वेच्छाचारी कार्य भइरहेको र राज्यसत्ताको दुरुपयोग गरेर तानाशाही लाद्ने दुष्प्रयास भइरहेको छ।’
नेपाल पक्षले ओलीको तानाशाही प्रवृतिका विरुद्ध देशभर समानान्तर कमिटी ब्युँताउने निर्णय समेत गरेको छ ।
अध्यक्ष ओलीले सोमबार मात्र वरिष्ठ नेता माधवकुमार नेपाल र उपाध्यक्ष भीम रावललाई ६ महिनाका लागि पार्टीको साधारण सदस्यबाट निलम्बन गरेका छन् । यसैगरी घनश्याम भुसाल र सुरेन्द्र पाण्डेलाई समेत कारवाहीको तयारी गरेका छन् भने नेपाल पक्षमा लाग्ने सबै नेता कार्यकर्तालाई एक एक गरी कारवाही गर्ने चेतावनी दिएका छन् ।
प्रतिक्रिया