भेरी अस्पतालमा बन्द अवस्थामा रहेको न्यूरो विभाग १ साता भित्र संचालनमा आउने

नेपालगन्ज । दरबन्दी भएर पनि मन्त्रालयले विषगत चिकित्सक नपठाएका कारण बन्द रहेको नेपालगन्ज स्थित भेरी अस्पतालको न्यूरो उपचार सेवा सुरु हुने भएको छ । पश्चिम नेपालको सबैभन्दा ठूलो रेफरल अस्पतालका रुपमा रहेको भेरी अस्पतालमा लामो समयदेखि दरबन्दी अनुसार न्यूरो विभागका चिकित्सक नहुँदा सेवा बन्द अवस्थामा रहेको विभागमा मन्त्रालयले न्यूरोलोजिष्ट पठाउने भएपछि सेवा सुचारु गर्न थालिएको हो ।

भेरी अस्पतालका लागि मन्त्रालयले टिचिङबाट न्यूरो सर्जरी सकेर पास आउट भएका डा.हेमन्त कुमार शाहलाई अनिवार्य छात्रबृत्ती करार अन्तर्गत नेपालगन्जमा पदस्थापन गरेको छ । न्यूरो विभागका सम्बन्धित चिकित्सक आउने भएपछि एक हस्ता भित्रै सेवा संचालन गर्ने तयारी गरिएको अस्पतालका मेडिकल सुपरिटेन्डेन्ट डा.प्रकाश बहादुर थापाले जानकारी दिए ।

यसअघि न्यूरो सर्जन डा. हरि पौडेल २०७६ साल पुसमा पठाएपछि भेरीमा पहिलो पटक न्यूरो सेवा सुरु भएको थियो । तर डा. पौडेलको ११ महिना पुरा नहुँदै गत मंसिर महिनामा धनगढी सरुवा गरिएपछि न्यूरो सेवा बन्द भएको थियो ।

लुम्बिनी प्रदेशको पश्चिमी क्षेत्र सहित कर्णाली र सुदुरपश्चिमको रिफर अस्पतालकारुपमा सेवा दिईरहेको अस्पतालमा न्यूरो विभाग नहुँदा दुर्घटना हुँदा र अन्य विविध कारणले टाउकोमा चोटपटक लागेर उपचारका लागि नेपालगन्ज आउने बिरामीहरु निजी अस्पताल वा भारतको लखनउ जान बाध्य थिए ।