काठमाडौं । त्रिभुवन विश्वविद्यालय (त्रिवि)ले महामारीका कारण रोकिएका सबै परीक्षा यस वर्ष नै सञ्चालन गर्ने तयारी थालेको छ ।
कोरोना भाइरसक परीक्षाको क्यालेन्डर नै खल्बलिएपछि परीक्षा नियन्त्रण कार्यालय (पनिका)ले रोकिएका सबै परीक्षा यथाशक्य सञ्चालन गरी क्यालेन्डर मिलाउने तयारी थालेको हो ।
गत वर्षदेखि रोकिएका सबै परीक्षा यसै वर्ष सकेर परीक्षा क्यालेन्डरलाई नियमित गराइने परीक्षा नियन्त्रक पुष्पराज जोशीले बताए । सम्भव भएसम्म भोतिक रुपमै नत्र अनलाइन माध्यमबाट परीक्षा सञ्चालन गरेर भए पनि क्यालेन्डर व्यवस्थापन गरिने उनले बताए ।
त्रिविको गत वर्ष भदौमा हुनुपर्ने स्नातक तह पहिलो वर्षको परीक्षा हालसम्म पनि हुन सकेको छैन । पनिकाले स्नातक तह दोस्रो वर्षको परीक्षा आगामी साउन ४ गतेदेखि र पहिलो वर्षको परीक्षा साउनको १० गतेदेखि सुरु गर्ने गरी तालिकासमेत सर्वाजनिक गरेको छ । त्यसपछि स्नातक तह कानुनको प्रथम वर्षको र स्नातकोत्तर तह दोस्रो वर्षको परीक्षा गर्ने तयारीमा पनिका छ ।
दशैंअघि २०७७ सालका परीक्षा सम्पन्न गरी दशैँपछाडि २०७८ सालका परीक्षा सुरु गर्ने तयारी पनिकाको छ । दशैँअगाडि हुने परीक्षामा दुई लाख ५० हजार र दशैँपछाडिको परीक्षामा करिब छ लाख परीक्षार्थी सहभागी हुने विश्वविद्यालयले जनाएको छ ।
पनिकाले विद्यार्थीलाई पायक पर्ने परीक्षा केन्द्र तोक्ने भएको छ । कोरोना भाइरसका कारण घर गएका परीक्षार्थीलाई सहज होस् भनेर पनिकाले विद्यार्थीले रोजेको परीक्षाकेन्द्रमा परीक्षा दिलाउने व्यवस्था गरिएको जोशीले बताए । योसँगै त्रिविको परीक्षा दिनकै लागि काठमाडौं आउने बाध्यतासमेत हटेको छ ।
प्रतिक्रिया