जनकपुरधाम । । प्रदेश-२ सरकारमा नेकपा माओवादी केन्द्र पनि सहभागी भएको छ । जनता समाजवादी पार्टी नेपाल नेतृत्वको प्रदेशमा माओवादी केन्द्रबाट शनिबार दुई जना मन्त्रीले शपथ लिएका हुन् । अब माओवादी केन्द्र प्रदेश २ मा आजदेखि सत्तारूढ दल बनेको छ ।
प्रदेश प्रमुख डा. राजेश झा अहिराजले आन्तरिक मामिला तथा सञ्चारमन्त्रीमा भरत साह र मुख्यमन्त्री लालबाबु राउतले रुवी कर्णलाई राज्यमन्त्री पदमा शपथ खुवाएका हुन् ।
साह महोत्तरी क्षेत्र नम्बर १(१) बाट निर्वाचित सांसद हुन् भने कर्ण सप्तरीबाट समानुपातिक सांसद हुन् । शुक्रबार बसेको माओवादीको संसदीय दलको बैठकले उनीहरुलाई सरकारमा पठाउने निर्णय गरेको थियो ।
शुक्रबार मात्र मुख्यमन्त्री राउतसमक्ष आन्तरिक मामिला तथा सञ्चारमन्त्री ज्ञानेन्द्रकुमार यादव र राज्यमन्त्री सरोज सिंह कुशवहाले राजीनामा बुझाएका थिए ।
जसपाका अध्यक्ष उपेन्द्र यादव पक्षले अर्का अध्यक्ष महन्थ ठाकुर पक्षका मन्त्रीलाई बर्खास्त गरेर गत जेठ २६ मा नेपाली कांग्रेसलाई सरकारमा सहभागी गराएका थिए ।
प्रतिक्रिया