काठमाडौं । नेकपा (एमाले)को स्थायी कमिटी बैठकले पाटीको विधान संशोधन प्रस्ताव पारित गरेको छ ।
ललितपुरको च्यासलस्थित तुल्सीलाल स्मृति प्रतिष्ठानमा बसेको बैठकले विधान संशोधन प्रस्ताव पारित गर्दै केन्द्रीय कमिटी बैठकमा लैजाने निर्णय गरेको हो । केन्द्रीय कमिटी बैठक आजै दिउँसो ३ बजे बस्दै छ ।
एमालेले आगामी भदौ २७ र २८ गते विधान महाधिवेशन आयोजना गर्ने निर्णय गरिसकेको छ । स्थायी कमिटी बैठकले संशोधन प्रस्ताव पारित गरेको उपाध्यक्ष वामदेव गौतमले बताए ।
यस्तै बैठकमा अध्यक्ष केपी शर्मा ओलीले पेश गरेको राजनीति प्रतिवेदन र महासचिव ईश्वर पोखरेलले सांगठनिक प्रस्ताव पारित भएको छ । यी प्रस्तावमाथि पनि केन्द्रीय कमिटी बैठकमा छलफल हुनेछ ।
बैठकमा वरिष्ठ नेता माधवकुमार नेपाल पक्षधर नेताहरु भने विगतमा जस्तै अनुपस्थित नै भए ।
पार्टीभित्र चरम विवादको अवस्थामा रहेको एमालेमा नेपाल पक्षले पार्टी एकताका लागि सबै भेला बैठक रोकेर सम्मानजनक सहमति कायम गरिनुपर्ने माग राख्दै आएको छ । सो पक्षले आफ्ना समानान्तर गतिविधि भने जारी नै राखेको छ । तर, संस्थापन पक्षले भने पार्टीको संगठनात्मक गतिविधि नरोकिने भन्दै निरन्तर बैठक भेला र महाधिवेशनकै घोषणा गरिसकेको छ । पार्टी एकताको नामममा अल्मलिन नसकिने पार्टीमा फर्किनेहरुलाई जहिले पनि स्वागत गरिने संस्थापन पक्षले बताउँदै आएको छ ।
प्रतिक्रिया