काठमाडौं । लुम्बिनी प्रदेशसभाको विशेष अधिवेशन र अविश्वासको प्रस्तावविरुद्ध परेको रिटलाई सर्वाेच्च अदालतको संवैधानिक इजलासमा पठाउने आदेश भएको छ ।
रिट उपर सुनुवाइ गर्दै सर्वोच्च अदालतका न्यायाधीश डा. आनन्दमोहन भट्टराईको इजलासले सो मुद्दालाई संवैधानिक इजलासमा पठाउने आदेश गरेको हो ।
मुख्यमन्त्री शंकर पोखरेलविरुद्ध परेको अविश्वास प्रस्तावमाथि छलफल गर्न बोलाएको विशेष अधिवेशन रोक्न माग गर्दै परेको रिटमा गम्भीर संवैधानिक व्याख्याको प्रश्न देखिएको आदेशमा उल्लेख छ ।
रिटमा अन्तरिम आदेश नभएका कारण प्रदेशसभाको बैठक सुचारु हुने बाटो खुलेको छ ।
लुम्बिनी प्रदेशसभाको विशेष अधिवेशन रोक्न माग गर्दै प्रदेश सभा सदस्य लीला गिरीले सर्वोच्चमा रिट दायर गरेका थिए । रिटमा प्रदेश प्रमुखको कार्यालय लुम्बिनी समेतलाई विपक्षी बनाइएको थियो ।
प्रतिक्रिया