बोलेरोले ठक्कर दिँदा मोटरसाइकल चालकको मृत्यु

उदयपुर । उदयपुरको बेलका नगरपालिका-९ खारखोलामा बोलेरोको ठक्करबाट सख्त घाइते भएका मोटरसाइकल चालकको उपचारका क्रममा मृत्यु भएको छ ।

जिल्ला प्रहरी कार्यालयका अनुसार ठक्करबाट गम्भीर घाइते भएका बेलका-२ का ४० वर्षीय रामचन्द्र राईको मृत्यु भएको हो ।

बुधबार दिउँसो मदन भण्डारी मार्गअन्तर्गत पश्चिमबाट पूर्वतर्फ गइरहेको प्रदेश १-०२-००२ च ४८७४ नम्बरको बोलेरोले बेलका-९ खारखोलाबाट पश्चिम जाँदै गरेको स ४ प ९१०५ नम्बरको मोटरसाइकलमा सवार रामचन्द्रलाई ठक्कर दिएको थियो ।

बोलेरोको ठक्करबाट घाइते रामचन्द्रलाई तत्कालै उपचारका लागि सुनसरीस्थित बिपी मेमोरियल अस्पताल धरानमा लगिएको थियो ।

उनको उपचारका क्रममा मृत्यु भएको जिल्ला प्रहरी कार्यलयका प्रहरी नायब उपरीक्षक बेदप्रसाद गौतमले बताए । चालक र बोलेरोलाई इलाका प्रहरी कार्यलय बेलका रामपुरले नियन्त्रणमा लिएको छ ।