काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डलाई कोरोना संक्रमण भएको छ ।
अध्यक्ष प्रचण्ड, नारायणकाजी श्रेष्ठसहित कैयौं माओवादी नेताहरुलाई कोरोना संक्रमण भएपछि माओवादीको केन्द्रीय कार्यालय समेत बन्द भएको छ ।
स्वास्थ्य अवस्थामा केही दिनदेखि असहजता महशुस गरेपछि प्रचण्डले शुक्रबार साँझ पीसीआर परीक्षण गरेका थिए । शनिबार आएको रिपोर्ट अनुसार उनलाई कोरोना संक्रमण पुष्टि भएको उनको निजी सचिवालयले जनाएको छ ।
प्रचण्डको अवस्था सामान्य रहेको छ । उनी निजी निवासमै आराम गरिरहेका छन् भने सम्पूर्ण भेटघाट एवं पूर्व निर्धारित कार्यक्रमहरु स्थगित गरिएको सचिवालयले जनाएको छ । प्रचण्डको सचिवालयले यस बीचमा सम्पर्कमा आएकाहरुलाई सतर्कता अपनाउन समेत अनुरोध गरेको छ ।
आठौं महाधिवेशनमा सहभागी भएका धेरै नेता कार्यकर्ताहरु यतिबेला कोरोना संक्रमण भएको भन्दै सामाजिक सञ्जालमार्फत आफसँग सम्पर्कमा आएकाहरुलाई सतर्क रहन आग्रह गरिरहेका छन् । नेता नारायणकाजी श्रेष्ठले पनि आफुलाई कोरोना संक्रमण भएको भन्दै आइसोलेसनमा बसेको जनाएका छन् ।
कोरोना संक्रमणकै कारण पुस २५ गते बस्ने भनिएको माओवादी केन्द्रीय समितिको बैठक समेत स्थगित भएको छ ।
प्रतिक्रिया