प्रधानमन्त्री देउवाले भने – एमसीसी अब पास हुन्छ

काठमाडौं । प्रधानमन्त्री शेरबहादुर देउवाले एमसीसी अब संसदबाट पास हुने दाबी गरेका छन् ।

प्रतिनिधिसभाको बैठकपछि संसदभवनबाट बाहिरिने क्रममा प्रधानमन्त्री देउवाले एमसीसी अब पास हुने बताएका हुन् । देउवाले दलहरूबीचको लामो रस्साकस्सीपछि संसद्‍मा टेबल भएको भन्दै अब पास हुने बताए । ‘अब एमसीसी के हुन्छ भन्ने ?’ संचारकर्मीहरुको जिज्ञासामा प्रधानमन्त्री देउवाले भने , ‘अब पास हुन्छ।’

सरकारले आजै मात्र संसदमा अधिकांश सांसदहरुको नाराबाजीका बीच एमसीसी टेबल गरेको छ । संचारमन्त्री ज्ञानेन्द्रबहादुर कार्कीले एमसीसी टेबल गर्ने बेलामा सत्तारुढ दल माओवादी केन्द्र र एकीकृत समाजवादीका धेरैजसो सांसदहरुसहित एमाले, राष्ट्रिय जनमोर्चा, नेमकिपा लगायतका सांसदहरुले एमसीसीको विरोधमा नारावाजी गरेका थिए ।

यसअघि सत्तारुढ गठबन्धनका शीर्ष नेताहरुको बैठकले एमसीसी संसदमा पेश गर्ने सहमति गरेको थियो । तर एमसीसीमा मतदान गर्ने विषयमा भने दलहरुबीच अझै कुरा मिलिसकेको छैन ।