नेपालगञ्ज । नेपालगञ्जमा शनिवार संकलन गरिएको थ्रोट स्वाब नेपाली सेनाको बिमानबाट परीक्षणका लागि काठमाण्डौ पठाइएको छ । शनिबार संकलन गरिएको ४ सय ५ जनाको थ्रोट स्वाब परीक्षणका लागि काठमाण्डौ पठाइएको हो ।
नेपालगञ्जको टांगा स्टेशन क्षेत्रबाट शनिवार संकलन गरिएको १ सय ६२ जनाको र बर्दियाका २ सय ४३ जनाको स्वाब नेपाली सेनाको बिमानबाट राष्ट्रिय जनस्वास्थ्य प्रयोगशाला काठमाण्डौ पठाइएको जिल्ला स्वास्थ्य कार्यालय बाँकेका फोकल पर्सन नरेश श्रेष्ठले जानकारी दिनुभयो ।
भेरी अस्पतालमा एक दिनमा १ सय स्याम्पल भन्दा बढी परिक्षण गर्न असम्भव भएपछि बढि संकलन भएका स्याम्पल काठमाण्डौ पठाइएको श्रेष्ठले बताउनुभयो । काठमाण्डौ पठाईएका स्याम्पलको रिपोर्ट २४ घण्टाभित्रै आउने उहांले जानकारी दिनुभयो ।
श्रेष्ठका अनुसार नेपालगञ्ज उपमहानगरपालिका वडा नं. ८ स्थित टांगा स्टेशनमा स्वाब संकलन गर्ने कार्य सकिएको छ भने नगर भवन आसपासको क्षेत्र तथा ११ नं. वडाको नाका टोलबाट स्वाब संकलन भईरहेको छ । स्थानीयस्तरबाट संकलन गरिएका नमुनाको परीक्षण भेरी अस्पतालको प्रयोगशालामा गरिने छ ।
नेपालगन्जमा मात्र २४ जनामा कोरोना संक्रमण भेटिएपछि नमुना संकलन गर्ने र परिक्षण गर्ने कार्यलाई तिब्र बनाईएको छ ।
प्रतिक्रिया