काठमाडौं । सत्तारुढ नेपाल कम्युनिष्ट पार्टी नेकपाको सचिवालय बैठक शनिबार बिहान (आज) बस्दैछ ।
प्रधानमन्त्री निवास बालुवाटारमा बस्ने बैठकमा विवादित नागरिकता विधेयक र अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) का विषयमा छलफल हुने बताइएको छ ।
शुक्रबार साँझ अध्यक्षद्वय केपी शर्मा ओली र पुष्पकमल दाहाल प्रचण्डसहितका नेताहरुबीच बसेको बैठकमा वैवाहिक अंगीकृत नागरिकता विदेशी बुहारीले बिहे गरेको सात वर्षपछि मात्र दिने विषयमा सहमति बनेको थियो ।
सचिवालय बैठकबाट नागरिकताको विषयमा थप छलफल गरी पार्टीको आधिकारिक धारणा आउने बताइएको छ । दुई वर्षदेखि विवादित रहेको नागरिकता विधेयकलाई यसै अधिवेशनबाट टुंगो लगाउन संसदको राज्यव्यवस्था तथा सुशासन समितिमा छलफल सुरु गरिएको छ ।
प्रमुख प्रतिपक्षी दल नेपाली काँग्रेसले विदेशी बुहारीले चाहेमा विहे लगत्तै नागरिकता पाउनुपर्ने अडान राखेको छ ।
यस्तै, पार्टीभित्र विवादित बनेको एमसीसी लगायतका विषयमा पनि छलफल हुनेछ । तर, एमसीसीबारे थप छलफल गरी निस्कर्ष निकाल्न असार १० गते पार्टी स्थायी कमिटीको बैठक बोलाइएको छ ।
प्रतिक्रिया